“Киприкларинг найзадай, янги чиққан майсадай...” Шундай таъриф сиз учун муболағадек туюлса, ўкинманг. Ҳозирда буни айни ҳақиқатга айлатириш имкони бор! Демак...
Киприкларни узайтирамиз!
Бугунги кунда киприк узайтириш ва улатишнинг бир қанча усуллари мавжуд бўлиб, шулар орасида икки усул кенг тарқалган:
Японча усул
Япон технологияси киприкларни битталаб ҳақиқий киприк ёнига ёпиштириб чиқишни назарда тутади. Бундай усулда ўстирилган киприклар сизга 3 ойгача беминнат хизмат қилиши мумкин.Ягона шарти ойда бир бор коррекцияга бориб туришингиз лозим. Мутахассислар киприклари қалин аммо калта қизларга айнан шу усулни тавсия этишмоқда. Кўзнинг ташқи бурчагидан ички бурчагига қараб киприклар калталатиб ёпиштирилади.
Анъанавий усул
Бир пайтлар голливуд актрисалари кенг фойдаланган бу усулда сунъий киприклар 2-5 донадан (тутам қилиб) қовоққа ёпиштирилади. Тутам киприклар ҳақиқий киприкларингиз учун бироз оғирлик қилиши мумкин, аммо ёпиштириш жараёни кам вақт талаб этиши билан эътиборли. Қўшимча парваришсиз ҳам икки ҳафта давомида кўзингизни қувнатиб туриши мумкин. Бу усул тўй ҳашамга отланганингизда, айниқса, самаралидир.
Сунъийми ёки табиий?
Киприк улаш учун сунъий ёки табиий хомашёдан тайёрланган толалар мавжуд. Масалан, шойи ёки қорақузан (норка) мўйнасидан тайёрланган улама киприклар ўзингизникидан деярли фарқ қилмайди. Бўлажак киприкларингизнинг узунлигини ҳам ўзингиз белгилайсиз. Истакка кўра 8, 10 ва 12 миллиметрли улама киприклар танланади. Аммо ҳаддан ортиқ узунлари нигоҳингизни қўғирчоқники сингари сохта қўрсатиб қўйишини ёдда сақланг.
Кимларга мумкин эмас
- Гарчи косметологлар киприк улашга мўлжалланган елим бутунлай безарар эканлигин таъкидлашса-да, базида аллергияга сабаб бўлиши мумкинлигини ҳам эътибордан четда қолдирманг.
- Кўз шиллиқ пардаси шамоллаган ва кўз хасталикларига чалинганда, ушбу гўзаллик муолажасини соғайгунга қадар ортга суриб туриш лозим.
- Шунингдек, қовоқлари тез ёғланадиган хонимларнинг улама киприклари узоқ муддат турмаслиги ҳам бор гап.
Тавсиялар
- Ёдингизда бўлсин, киприк улатгандан кейин турли мойлар ва кремлардан камроқ фойдаланишга тўғри келади.
- Юзни ювиш жараёнида кўз атрофига эҳтиёткорлик билан тегиш тавсия этилади.
- Декоратив косметика улама киприкларнинг умрини қисқартиради. Умуман олганда бундай киприк соҳибалари туш ва шунга ўхшаш воситалардан фойдаланмаганлари мақсадга мувофиқ.
- Қорин билан ётишга одатланган аёллар диққатига агар не ҳасратда эришган киприкларингиз бир кечадан яроқсиз ҳолга келиб қолишини истамасангиз бу одатингиздан дарҳол халос бўлинг.
- Шунингдек, сунъий киприкларга шакл бераман деб оввора бўлманг. Бу ҳам ачинарли оқибатларга олиб келишини хисобга олган ҳолда, тажриба ўтказмасликни маслаҳат берамиз.
- Киприк улатгандан сўнг 24 соат давомида кўзга сув теккизмаслик, 48 соат давомида эса юз учун буғли муолажаларни амалга оширмаслик лозим.
Саодат тайёрлади.
