1. Бисквит тайёрлаш учун тухум оқини кўпиртиришдан олдин бир чимдим туз қўшиб юборинг. Шунда тухум осонроқ кўпиради.
2. Пишириқ учун бизе тайёрлаш керак бўлса, тухумларни 30 дақиқа совуқ сувга солиб қўйинг. Бу тариқа тухум оқини сариғидан ажратиш осонроқ бўлади.
3. Суюқ таом пишираётганингизда тузни кўп қўшиб юбордингиз. Хўш, энди нима қиласиз? Сув қўшиб, таъмини бузманг, яхшиси, бир сиқим гуруч солинг. Гуруч ортиқча тузни ўзига сингдириб олади.
4. Таомни аралаштириш ҳам бир санъат! Ишонмайсизми? Овқат пишираётганда таомни соат айланаси бўйлаб, аралаштиришга одатланинг. Шунда барча масаллиқлар бир маромда «ўгирилиб» мазаси яхшиланади.
5. Овқатга дафна баргини солсангиз, узоқ муддатга қолдирманг. Айниқса, қовурма таомларда жуда зийрак бўлиш керак. Чунки дафна барги таом таъмини таҳирроқ қилиб қўяди.
6. Қуритилган саримсоқли зираворни таом пишишига яқин қўшиш керак. Йўқса, зиравор таъми сезилмай қолади.
7. Қайнатилаган картошка пишишига яқин 1 ош қошиқ лимон шарбатини қўшиб юборинг. Таъми жуда хушхўр ва майин бўлади.
8. Нонуштага қуймоқ тайёрлаётган бўлсангиз, хамирига озроқ хамиртурушдан қўшинг. Қуймоқлар енгилгина кўтарилиб пишади.
9. Краб таёқчаларидан тайёрланадиган салатга туз қўшиш шарт эмас. Денгиз маҳсулотининг тузи меъёрида бўлиб, салатга ҳам етарлича таъм беради.
10. Дудланган гўшт ёки колбасадан тайёрланадиган салатларга бодринг ёки салат барги қўшилгани маъқул. Шунда тузлилик даражаси тўғри тақсимланади.
11. Мевали салатга пишлоқ қўшиб кўрганмисиз?! Албатта, синаб кўринг. Меваларнинг ширин таъми ва пишлоқдаги шўртанлик бир-бири билан мос келади. Истеъмол қилинганида антиқа мазани ҳис этасиз.
12. Пишлоқ ва бринзани тўғрашга қийналаётган бўлсангиз, пичоқни сувда намлаб, сўнг ишлатинг. Шунда пишлоқ ҳам, бринза ҳам осон ва керакли шаклда кесилади.
13. Салат учун гўшт қайнатгандингиз. Мўлжалга салгина адашдингиз чоғи, ярми ортиб қолди. Бир-икки кун сифатини йўқотмай сақланиши учун гўштни зар қоғозга ўраб, сўнг яҳхонага қўйинг. Фойдаланишдан 1 соат олдин хона ҳароратида аслига қайтади.
14. Ҳарид қилинган творогнинг таъми эртасигаёқ ўзгариб қолган бўлса, ташлаб юборишга шошилманг. Яхшиси майиз, икки дона тухум, ярим стакан шакар, хамирюмшатгич ва ун қўшинг-да, печенье пиширинг.
15. Меҳмонжонлар қуруқ қўл билан келмай деб, музқаймоқ олиб келишдию, яххона ширинлик билан тўлди. Шуу-у-унчасини еб тугатолмайсизку?! Яхшиси, музқаймоқларни эритиб, коктейль тайёрланг. Ёки мевалар билан аралаштириб, салат қилинг.
16. Лаваш хамири целлофанидан олинганидан сўнг ишлатилмаса, қотиб қолишини биласиз. Шундай бўлмаслиги учун кераклигини олинг-да, қолганини зичлаб целлофанга солиб қўйинг.
