Бир идорага йўлим тушди, котиба қиз менга керакли маълумотномани беришдан бош тортди. «Менга мана бу маълумотномани олиб келишингиз керак», дейди у жилмайиб. Котиба қизга қараб, одамларга таъсир қилиш каби хислатим йўқлигидан афсусланаман. Руҳшуносларнинг айтишича, кишиларга таъсир қилиш мумкин, бунинг учун атиги 5 та қоидага амал қилсангиз бас. Шунда эрингиз ҳам, қулоқсиз фарзандингиз ва ҳатто ҳамкасбларингиз ҳам гапларингизни эшитишни ўрганади.
Мақтов мўъжиза яратади
Инсоннинг ўзига хос хусусиятлари ёки уринишлари учун уни мақташни унутманг. Ҳатто у бирор ишни айнан сизнинг кўнглингиздагидек бажармаган бўлса ҳам. Шунда у сизга янада кўпроқ ёқиш учун ҳаракат қила бошлайди. Масалан, фарзандингиз билан дарс қилишга ваъда бердингиз, аммо вақтингиз тиғизлиги сабаб улгура олмаяпсиз, дейлик. Шунда секин турмуш ўртоғингизнинг ёнига бориб, «дадажониси, ўғлингиз (қизингиз) билан бирга дарс қилинг, ўзингиз ҳамма нарсани биласиз-ку!» дейишингиз мумкин. Нима деб ўйлайсиз: бу сўзлар акс таъсир бериши мумкинми?
Камчиликларингизни тан олишни ўрганинг!
Беайб Парвардигор, дейишади. Ҳаётда ҳар жиҳатдан ўзини идеал қилиб кўрсатишга уринадиганларга ҳар доим ҳам ишонавермаймиз. Ўз камчилигини тан олиб, ҳатто бу уларни ҳазилга айлантирган киши эса дарҳол эътиборимизни торта олади. Масалан, раҳбарингизга «ойлигимни оширинг», деб кирганингизда ўз ютуқларингиз билан биргаликда камчиликларингизни-да айтиш ҳам иш беради. Аммо бу камчиликларни вақтида пайқаб, олдини олганингизни ҳам айтиб ўтишни унутманг.
Хизматга хизмат
«Ким менга ёрдам бера олади?» деб эмас, «Менинг кимга нафим тегади?» деган фикрда юринг. Чунки бизга ёрдам берган киши қаршисида ўзимизни қарздор сезамиз. Эрингиз эртанги ишларингизга ёрдам беришини истасангиз, бугун унинг энг яхши кўрган таомини пиширинг. Кейин эса ёрдам сўрашдан тортинмасангиз ҳам бўлади. Айнан мана шу услуб ишхонада ҳамкасблар орасида ҳам яхши муносабатлар қуриш учун хизмат қила олади. Улардан ёрдам сўрашни ҳам ўрганинг.
Тинглай билинг!
Ҳамма эшитади, аммо суҳбатдошини тинглай оладиганлар саноқли. Баъзиларга бу табиатан берилган бўлса, баъзилар эса бу санъатни ўрганишларига тўғри келади. Суҳбатдошингизни тинглашни, унинг сўзларини қизиқиш билан эшитишни ўрганинг. Агар бирор нарсани эшитмай ёки тушунмай қолсангиз, қайта сўраб билишдан тортинманг. Суҳбатдошингиз завқ билан жавоб бериши мумкин бўлган саволларни ўртага ташлашни ҳам унутманг. Бу қаршингиздаги кишида сизга нисбатан майл уйғотади. Инсон табиати шундайки, у ўзига хуш ёққан кишиларнинг фикрига қўшилади.
Мулойим бўлинг!
Аксарият ҳолларда бу иш беради. Бу борада дунё олимлари тадқиқот ўтказишган: улар аввалига сўровнома ўтказишдан мақсад нималиги ва манзилни ёзиб, анкета тарқатишган. Анкеталарнинг атиги тўртдан бир қисми тўлдирилган ҳолда қайтиб келган. Кейин эса худди шу анкетага уни тўлдириш илтимос қилинган откритка ёпиштириб тарқатишган. Бу гал эса анкеталарнинг ярмидан кўпи тўлдирилган ҳолда қайтган. Шундай экан, қаршингиздаги инсон билан доим мулойим муомалада бўлинг, қўполлик қилманг. Қўполлик билан ҳар қандай яхши ишни ҳам бузиб қўйиш, ширин сўз орқали эса ҳар қандай вазиятни ўнглаш мумкин.
Факт
Инсонлар билан мулоқотда ўзингизга нисбатан ишончингиз баланд бўлиши муҳим. Дарвоқе, табассум қилишни ҳам унутманг!
МАДИНА тайёрлади.
Манба: "SUG‘DIYONA"
