Тажрибадан шу нарса маълумки, аксарият одамлар бирор фалокатдан жабр кўрган инсонга ёрдам беришдан қўрқади, чунки бундай ҳолатда унга қандай ёрдам кўрсатишни билишмайди. Бу долзарб муаммони ҳал этиш учун Хитойнинг Чжэцзян университети ўқитувчилари чўккан одамга биринчи ёрдам кўрсатиш учун мўлжалланган махсус адёлни ихтиро қилишди. Улар бу ихтиро орқали кўпчиликнинг ҳаётини сақлаб қолишларига умид қилишмоқда...
Фавқулодда вазиятларда инсон биринчи ёрдам кўрсатиш олдидан ўзини хотиржам тутиши, шошилмаслиги лозим. Агар жабрланган одам ҳушдан кетган бўлса, кўпчилик уни ўзига келтириш учун нотўғри ҳаракатларни амалга оширади. Бу айниқса жиддий шикаст олганда жуда хатарлидир. Бундай ҳолатда албатта, тиббиёт ходимларининг аралашуви зарур бўлади.
Мазкур муаммони ҳал этиш учун “Биринчи ёрдам кўрсатиш адёли” номли махсус лойиҳа ишлаб чиқилди. Бу адёл тўқимачилик маҳсулоти бўлган газмолдан тайёрланган бўлиб, унда тиббиёт ходимлари етиб келгунча биринчи ёрдам кўрсатишда қандай ҳаракатларни амалга ошириш йўриқномаси аниқ ва равшан қилиб, ёзиб қўйилган.
Адёл жабрланган одамга зарар етказмай, биринчи ёрдам кўрсатишни истаган ҳар бир одам учун мўлжалланган. У айниқса, чўккан одам учун жуда фойдалидир.
