Об-ҳаво таъсирида сочлар табиий кўринишини йўқотиши мумкин. Айниқса, бўялган сочлар осон зарарланади. Сизни чўчитмоқчи эмасмиз, шунчаки бўялган сочлар парвариши борасида бир қанча тавсияларни ҳукмингизга ҳавола этмоқчимиз. Маслаҳатларимиз сизга асқотишидан умидвормиз. Унутманг, сочларингизнинг соғлом ва табиий кўриниши ўз қўлингизда!
Сочни ювиш...
Бўёқ таъсирида сочлар қуруқлашиб, синувчан кўринишга келади. Шу боис уларни ҳар 3-4 кунда шампунь билан ювишни маслаҳат берамиз. Аммо бу муолажани кунора бажариш тавсия этилмайди. Чунки шампундан ортиқча фойдаланиш соч толаларининг ҳимоя қобиғини зарарлаши мумкин. Бордию сочларингиз жуда ҳам қуруқлашиб, тарашга қийналсангиз, турли гиёҳ дамламалари билан парваришлаш мумкин.
Ипакдей майин бўлсин десангиз...
Бўялган сочлар парваришида энг маъқули — оддий тухумдан тайёрланган ниқоблардир. Бундай ниқобни тайёрлаш учун бор-йўғи икки дона тухум керак бўлади. Тухумларни чақиб, аталанг-да, озгина қайнаган сув билан аралаштиринг. Сўнг бироз намланган сочларга илдизидан бошлаб узунасигача суртинг. 5-6 дақиқадан сўнг илиқ сув ва шампунь билан чайишингиз мумкин. Бундай муолажадан сўнг сочлар жонланиб, жилваланади.
Бу муҳим!
Мунтазам турли рангларга бўяш сочлар тўкилишига олиб келади. Шу сабабли ҳафтада бир марта бўлса ҳам сочни мустаҳкамловчи ниқоб тайёрлашга эринманг. Ахир сочни бўяш орқали соғломлаштириб бўлмайди-ку!
Тўкилишга қарши рецепт
Алоэ, асал, саримсоқ пиёз... Мазкур уч маҳсулотдан тайёрланган ниқоб соч илдизини мустаҳкамлайди. Ниқобни тайёрлаш учун 1 ош қошиқдан алоэ шарбати ва асал, 1 чой қошиқ саримсоқ пиёзнинг суви керак бўлади. Учала маҳсулот шарбатини яхшилаб аралаштириб, намланган сочга суртинг. Сўнг целлофан билан бошни ўраб, 20 дақиқага қолдиринг. Сочни чайишда илиқ сув ва аталанган 1 дона тухум сариғидан фойдаланишингиз мумкин. Мазкур ниқоб соч илдизини мустаҳкамлаб, тўкилишининг олдини олади.
Мустаҳкамлаш учун...
1 дона тухум сариғи ва 1 ош қошиқ асални аралаштириб, соч илдизига суртинг. Сўнг бошни аввал целлофан пакет, кейин сочиқ билан ўранг. 30 дақиқадан сўнг сочларингизни илиқ сувда ювинг. Бундай ниқобни ҳафтасига бир марта бўлса ҳам тайёрласангиз, сочларингиз хар қандай тажрибаларга ҳам чидамли бўлади.
Манба: «SUG‘DIYONA» газетаси.
