— Шифокорлар менга симпотоганглионит ташхисини қўйишди. Касаллик варақасида эса тери герпеси деган сўзлар ҳам акс этган. Мана шу ҳолатга аниқлик киритсангиз? Аслида иккиси бир хасталикми ёки бўлакми?
М.И., Тошкент шаҳри
Рустам ЗОКИРОВ, шифокор дермато-невролог:
— Симпатоганглионит, бу симпатикнерв ганглияларининг яллиғланиши бўлиб, аниқ чегараланмаган ачишувчи оғриқ ва маҳаллий трофик ўзгаришлар билан кечади. Хасталик кўпинча ўткир инфекцион касалликлар (грипп, қизамиқ, дифтерия, зотилжам, ангина, кўкйўтал, дизентерия, сепсис, сарамас) ва сурункали инфекциялар (туберкулёз, сифилис, бруцеллез, ревматизм) оқибатида келиб чиқади. Бундан ташқари, симпатоганглионитнинг бирламчи вирусли кўриниши ҳам тафовут этилади ва у герпетик инфекция натижасида юзага келиши мумкин. Саволингиз мазмунидан сизга қўйилган ташхисда касалликни пайдо қилган омил герпетик инфекция эканлиги назарда тутилган. Агар тўлиқ текширувдан ўтган бўлсангиз, албатта муолажани кечиктирманг.
