КИР ЮВИШ ҚОИДАЛАРИ

Матони сувда ивитишдан аввал унга ёпиштирилган ёрлиғига назар солинг. Қандай ҳароратда, қандай кир ювиш кукунидан фойдаланиш лозимлигини билиб олинг. Бу кийимнинг узоқ хизмат қилишида жуда муҳим.

• Мато ранги ҳам эътибордан четда қолмасин. Иссиқ сувга бир учини ботириб кўришингиз мумкин. Агарда сувга озгина ранги чиқса, демак, иссиқ сув ишлатиб бўлмайди. Аксинча бўлса бемалол ивитиб ювишингиз мумкин.
• Ёдингизда бўлсин, кир оқартирувчи эритманинг ҳаммаси ҳам фойдали бўлавермайди. Аввал матонинг ёрлиғида оқартирувчи эритма учун рухсат бор-йўқлигига қизиқиб кўринг. Чунки баъзи матолар кўринишидан мустаҳкам бўлса-да, аслида турли эритмали ишқорларга жуда таъсирчан бўлади. Натижада эса матонинг ранги хиралашиши ёки умуман зарарланиши мумкин.
• Сувга кир ювиш кукунидан солганингиздан сўнг албатта уни аралаштиринг. Йўқса, кийим матосида кукунинг ранги сақланиб қолади.
• Ювилган кирларни албатта совуқ сувда чайинг. Чунки совуқ сув либос матосини таранглаштиради ва кир ювиш кукунидан ҳосил бўлган кўпикни яхши кетказади.

Манба: «SUG‘DIYONA» газетаси.