АСАБИЙЛИКНИ ЕНГИШНИНГ 4 ҚОИДАСИ

Нега кайфиятингиз йўқ? Нима безовта қилаяпти? Бундай саволлар атрофдагилар эътиборидан четда қолмайди. Тўғри-да, биргина сизнинг кайфиятингиз бошқаларникига ҳам таъсир этишини билмасмидингиз? Турли вазиятларда асаббузарликка дуч келишингиз табиий. Аммо бир ўйлаб кўринг, бу шунга арзийдими? Жавоб беришдан аввал қандай қилиб асабийлашмаслик қоидалари билан танишиб чиқинг...

• Ишда бошлиғингиздан дакки эшитганингиз учун асабийлашаётган бўлсангиз, дарҳол ўзингизни қўлга олинг. Бир неча дақиқа тоза ҳавога чиқиб, чуқур нафас олинг-да, яна ишингизга қайтинг. Хаёлингиздаги турли нохуш ўй-фикрларни қувиб, яхши нарсаларни ўйланг. Кўрасиз, бу фойда беради!
• Кимдандир аразлашдан аввал «Ўзимдан бирор камчилик ўтмадимикан?» деб ўйлаб кўринг. Мабодо ўзингизнинг айбсизлигингизга ишонсангиз, жуда яхши, араз-гинани йиғиштириб, яна ҳаётдан завқ олинг. Кўрдингизми, ўзингизни қанчалик ҳақ деб билсангиз, бошқалар ҳам ўзлари ҳақида худди шундай фикрда. Бунинг учун асабийлашиш шарт эмас.
• Турмуш ўртоғингиз билан хафалашиб қолдингизми? Бунинг учун кўз ёш тўкиб, асабингизни жиловлай олмай қолманг тағин. Энг маъқули бироз сукут сақланг. Сўнг илиқ душ қабул қилиб, аччиқ қаҳва ёки чой ичинг. Озгина шоколад бўлса, янаям яхши. Қарабсизки, кўнглингиздаги қорая бошлаган ғуборлар аста-секин тарқаб, ўрнига яна «қуёш чарақлайди».
• Бироз эътиборсиз бўлишни ҳам ўрганинг. Ҳар нарсага куйиб-пишаверишингиз ўзингизга зарар қилмасин. Муаммоларни салгина ортга ташласангиз, ташвишингиз ҳам камаяди. Бу эса яхши кайфиятни таъминлайди. Хуш кайфият эса албатта асабни тинчлантирувчи малҳамдир!

Манба: «SUG‘DIYONA» газетаси.