— Турмуш ўртоғим спиртли ичимликларга ичса, бош оғриқлари, ошқозон безовталикларидан тез-тез шикоят қилади. Яқин кунлардан бошлаб, кўз ичининг қизариб кетаётганини айтаяпти. Эшитишимча, спиртли ичимликлар кўз ички босимининг ортишига сабаб бўларкан. Сурункали давом этганида кўз тўр пардасининг кўчишини келтириб чиқаради дейишди. Ростми шу? Бу вазиятда қандай йўл тутишни маслаҳат берасиз?
А. Самарқанд шаҳри
Ҳикматулло СОДИҚОВ, офтальмолог:
— Кўриш қобилиятининг сустлашиши, кейинчалик бутунлай йўқолишига сабаб бўлувчи омиллардан бири этил спиртидир. Мунтазам спиртли ичимлик истеъмол қилиш кўрув нерви атрофиясига олиб келади. Алкоголь маҳсулотлари инсон бош миясининг ақлий фаоллик учун жавобгар қисмини зарарлаб, фикрлаш, диққатни жамлаш ва тана мувозанатини назорат қилиш каби жараёнларни издан чиқаради. Спиртли ичимлик ичиш жигар, меъда ва ичаклар, юрак ҳамда репродуктив аъзолар фаолиятига зарар етказишини яхши биласиз.Ичимлик қон томирларига синггач, эритроцитларнинг бир-бирига ёпишиб қолишини келтириб чиқаради. Бу эса майда капиллярнинг тўлиб қолиши ва ёрилишига олиб келади. Тиқилма ҳосил бўлган капиллярда эса босим ортади. Алкоголь қабул қилган кишининг аввалига кўзлари қизаради, сўнг майда капиллярларнинг ёрилиши юз беради. Спиртли ичимлик бош миядаги нерв ҳужайраларини нобуд қилади. Ҳужайраларнинг янгиланиши учун эса организмга суюқлик керак. Эрталабки ташналикнинг боиси айнан шундан. Англаганингиздек, турмуш ўртоғингизнинг соғлигидаги ўзгаришлар спиртли ичимликнинг ножўя асоратларидир. Сизга маслаҳатим, мутахассис билан маслаҳатлашган ҳолда умр йўлдошингизнинг зарарли одати билан курашинг.
