Либос, услуб, урф ҳақида сўз кетганида америкалик модельер, «business women» Донна Караннинг «Менинг ишим – қулайлик ва ҳашам, фойда ҳамда истакни уйғунлаштириш», деган фикри ёдимга тушади. Муҳими ҳам шу! "Даракчи" газетасининг "Мода" лойиҳаси орқали ўз ишининг устаси дизайнер Дилноза УМРЗОҚОВА замонавийлик ва миллийлик уйғунлиги сирлари билан бўлишади...
КУНДАЛИК УСЛУБ
Дилноза УМРЗОҚОВА, дизайнер: — «Кэжуал» услубига хос бу чопон шойи матосидан бўлиб, Хоразм йўналишида майда қавилган.
Мато таркиби ипакдан бўлгани боис танани қишда иссиқ, ёзда салқин тутади. Бу каби чўпонларни жинси шим, классик услуб билан уйғунлаштиришлари мумкин. Чопонларнинг қулайлиги шундаки, аксессуарни алмаштириб, оқшом либоси билан базмларга ҳам кийиш мумкин. Ташқи кўринишни мукаммал қилиш учун чўпон рангига мос миллий матодан тикилган оёқ кийим кийиш мақсадга мувофиқ.
Кичик ёшдаги қизчаларга чопонда юриш ноқулай бўлгани боис шойидан тикилган миллий йўналишдаги кўйлак энг яхши танлов. Аксессуар сифатида миллий матога қўл меҳнати билан қадалган тошли «ободок»дан фойдаланишингиз мумкин.
БИЛИБ ҚЎЙГАН ЯХШИ!
Бу чопонлар «олам»ига иккита йўналиш киритилди: енгсиз нимча ва тизза ва тўпиқ оралиғи узунлигидаги тўн.
Бўй танламайди…
Тизза ва тўпиқ оралиғида бўлган узунликдаги тўн ҳам бўйи баланд, ҳам паст бўйли қизларга бирдек мос келади.
Паст бўйлилар…
Калта чопон паст бўйли қизларни оёғини узун қилиб кўрсатишга ёрдам беради. Ва баланд пошна кийишга ҳожат қолмайди.
Тўлачадан келганлар…
Тўлачадан келган аёллар-қизлар одатда майда гулли тор услубдаги чопонларни афзал билишади. Бироқ кенг тикилган ва баъзи жойида катта гули бўлган чўпонлар қоматингизни визуал равишда кўнгилдагидек қилиб кўрсатишга қодир.
Тўлача қизларга енгсиз нимчалар энг муносиб танлов. Чунки енг ҳам қўшимча ҳажм беради, бундан қочиш керак.
ОҚШОМ ЛИБОСИ
Дилноза УМРЗОҚОВА, дизайнер: — Мазкур услуб – оқшом либоси ҳеч кимда такрорланмайдиган, ўзига хос кўринишда бўлишни хуш кўрувчи қизларимиз учун. Оч сиёҳрангдаги мазкур «гипюр»ли кўйлак қўл меҳнати ёрдамида дурлар билан бойитилган. Оқшом либосини миллийлик билан уйғунлаштириш мақсадида замонавий матони қавиб, сўзана нақшига тошлардан безак бериб чопон тикилган.
Қизчаларга ҳам миллий ва завмонавий услубда байрамона либос танлаш қийин эмас. Тепа қисмига миллий матодан кофта, пастига «газ» матосига, «сетка»дан қат-қат бурма шакл бериб тикилган юбка тўғри танлов. Қизчалар юбкаларни яхши кўргани боис тепа қисмидаги кофта ва акссесурниалмаштириб, услубни осонгина ўзгартириш мумкин.
Нималар урфда?
Бу йил баҳор-ёз ойларида барча рангларнинг оч тусдаги нафис ранглари урфда. Оқшом либосларида эса шойидан тикилганларини танлаганингиз маъқул. У табиий жилоси билан ўзгача кўриниш беради.
Садоқат АЛЛАБЕРГАНОВА тайёрлади. Фотомухбир: Ислом РЎЗИЕВ
