— Мунтазам бош оғриқларидан қийналиб кетдим. Айниқса, бошимнинг ярмижуда қаттиқ оғриб қолади. Эшитимча, бундай безовталик мигрен (шақиқа) белгилари бўлиши мумкин экан. Аслида ҳам шундайми?
Ситора ЮНУСОВА, Бухоро шаҳри
Гуллола ИСРОИЛОВА, невролог:
— Аввалига безовталиклар мигрен билан боғлиқми-йўқми, шуни аниқлаштириб олиш лозим. Мигрен – бош мияда қон айланишининг бузилиши сабаб келиб чиқадиган ўзгаришдир. Бунинг оқибатида қон томирларида сиқилиш (спазм) содир бўлиб, бошнинг ярим палласида оғриқ пайдо бўлади. Оғриқ турли характерда бўлиши мумкин: енгил, ўртача ёки кескин. Давомийлиги ҳам бир неча дақиқадан бир неча кунгача чўзилиши айтилади. Бош оғриғини мигрен билан адаштириб бўлмайди. Оддий бош оғриғи организмдаги турли ўзгаришлар, ташқи омиллар сабаб келиб чиқади. Мигреннинг сабаби эса юқорида айтганимиздек, бош мияда қон айланишининг бузилиши билан ифодаланади. Баъзилар мигрен оғриқлари кўнгил айниши, ҳолсизлик, бош айланаши, кўнгил айниши билан характерланади, дейишади.
Ҳар бир организм индивидуал кўринишда бўлгани боис бу белгилар ҳаммада турлича бўлиши мумкин. Мигрен жуда инжиқ касаллик, об-ҳаво ўзгариши, тор кийим, жисмоний зўриқиш, асабийлик ҳам мигрен хуружларини келтириб чиқариши мумкин. Шифокорлар касалликнинг энг яхши давоси шифокор буюрган препаратлар ҳамда ором олиш, дейишади. Хасталик хуружларини аниқлаштириб олиш мақсадида ён-дафтар тутишни маслаҳат бераман. Бунинг ёрдамида оғриққа сабаб бўлаётган ҳолатларга ойндинлик киритиш осон бўлади.
