Уй бекаси деган сўзни эшитганда кўпчиликнинг кўз ўнгида дарров эртадан-кечгача ошхонада уймаланишу уй тозалашдан ортмайдиган, ўзига вақт ажратишга сира ҳафсала қилмайдиган аёл гавдаланади. Агар сиз ҳам уй бекаси деганда эгнида фартук, бир қўлида чанг латта билан ишдан бош кўтармайдиган аёлни тасаввур қилсангиз, янглишасиз! Ишга бошдан-оёқ шўнғиб кетганингиз учун ҳам уй бекаси бўлишнинг афзал жиҳатларию гаштини билмайсиз-да! Карьера ортидан қувиб, уй бекаси бўлишнинг ширин гаштидан мосуво аёллар, қуйидаги ўнталикни ўқиб, «Бугуноқ ишдан бўшайман!» деб қолмасангиз бўлди...
1. Эрта тонгда соат қўнғироғи жиринглаши билан уйқудан зўрға кўз очиб, оёғи куйган товуқдан шошиб юрмайсиз. Тўйиб ухлаб, кўнгилдагидек нонушта тайёрлаб, турмуш ўртоғингизни ишга, болаларни боғчаю мактабига хотиржам кузатасиз.
2. Автобус бекатида асабий ҳолатда соатлаб транспорт кутиб, камига сиғмай қолганингиз учун таксига ортича пул сарфламайсиз. Машинада тирбанд йўлга тушиб олиб, психиатрга навбатдаги мижоз тайёрламайсиз.
3. Дам олиш кунларини орзиқиб кутиб, натижада эса у кунни фақат уюм турган кирлару уй тозалашга сарфламайсиз. Оилавий кино, театр, дам олиш масканларига бориб, маза қилиб ҳордиқ чиқарадиган уй бекалари сафидан жой эгаллайсиз?!
4. «Менга йигирма тўрт соат ват камлик қиляпти», дея узундан узоқ режаларни амалга ошириш мақсадида ўзингизни ўқа-чўқа урмайсиз. Вақтни тўғри тақсимловчи уй бекалари бу борадаги барча минусларни аллақачон плюсга айлантириб бўлган.
5. Уй ишларию оила аъзоларининг хизматидан ортиб, шахсий қизиқишларга муаммосиз вақт топилади. Истасангиз машина ҳайдашга, хоҳласангиз ошхона борасидаги фантазияларингизни оширишга имкон топасиз.
6. Вақтида дам олиб, вақтида овқатланганингиз учун ҳар ой гастроэнтеролог ҳузурига чопавермайсиз, ишдаги кўнгилсизликларни деб жиғибийронингиз чиққанидан эса руҳшуносдан дугона излашга тўғри келмайди.
7. Уй бекалари ўзини яхши кўрсагина атрофидагилар ҳам унга худди шундай муносабатда бўлишини билади. Устига-устак гўзаллигига урғу беришга ватқи етарли. Шундай ҳолатдагина ёнида гўзал, мафтункор рафиқасини кўрган эркак кўчага эмас, уйга талпиниши ҳам турган гап!
8. Ишлайдиган аёлларнинг кун тартиби сира ўзгармайди. Эрталаб ишга, кечқурун уйга шошади. Бу ҳол ҳар куни такрорланади. Уй бекалари эса ватқини хуш ўтказади. Бора-бора ҳеч ким пайқамай қўядиган уй буюмларидан бирига айланиб олишдан ўзларини салашади.
9. Яқинларини бориб кўриш нарёқда турсин, оила аъзоларига зўрға вақт топадиган аёллардан фарқли ўларо шахсий юмушлар учун ишдан жавоб сўрашга тўғри келмайди.
10. Энг муҳими, оиладаги хотиржамликка путур етмайди. Ахир турмуш ўртоғингиз эшикдан кириб келганида, очиқ чеҳра билан кутиб олиб, иссиқ чойю кечки овқатини ёнига қўйсангиз қайси эркакка ёқмайди, дейсиз? Қайнонангизнинг ҳам асабини асрайсиз! Уй бекаси бўласизми ё карьерист бундан қатъи назар олтин ўрталикни йўқотмасангиз бас!
Манба: «SUG‘DIYONA» газетаси.
