Ҳадемай қишнинг совуқ кунлари бошланади. Хўш, совуқ мавсумни қарши олишга тайёрмисиз? Жавоб беришдан аввал хоналарни бирма-бир кўздан кечиринг. Ҳеч қаерида совуқ ҳаво кириши учун ёриқлар ёки тешиклар йўқми, дераза ойна ва ромлари мустаҳкам ўрнатилганми? Агар бирор ерда муаммога дуч келсангиз, дарҳол уни бартараф этишга киришинг. Бу ишда биз сизга ёрдам берамиз. Уйни иситиш учун қизиқарли ва фойдали маслаҳатлар билан танишинг.
Қаердан совуқ кираяпти?
Дераза ва эшиклар, шунингдек, деворларнинг бирлашган қисмига яқинроқ келиб, гугурт чақинг. Олов ҳаракатини кузатинг. Совуқлик қаердан кираётган бўлса, олов ўша тарафга ҳилпирайди. Бир қарашда бу катта муаммодек туюлмаса-да, аслида мана шундай кичик тешиклардан кираётган совуқлик хона ҳароратига зимдан таъсир этади.
Кириш эшиги
Агар эшик ва унга туташган девор орасида ёриқлар бўлса, дарҳол уларни бекитиш керак. Бунда қурилиш ишларида ишлатиладиган монтаж кўпиги ёки пластмасса хом ашёсидан тайёрланган энсиз узун тахтача (рейка)лар қўл келади. Агар монтаж кўпигидан фойдаланишни истасангиз, ишингиз осон битади. Пластмасса тахтачаларни эса девор орасидаги тешик ўлчамига мослаб танлаш ва тўғри ўрнатишни уддалаш керак. Яхшиси, бу ишни эркаклар бажаргани маъқул. Сиз эса дераза ва ромлар орасига диққат қилинг.
Дераза ва ромлар
Совуқ ҳаво уйга кўпроқ дераза ва ромлар орасиан «ҳужум қилади». Бундай муаммога дуч келмаслик учун ҳаво иссиқлигида тешикларни ёпиб олинг. Бунда сизга яна монтаж кўпиги ёрдам бериши мумкин. Агар қурилиш хом ашёсига мурожаат қилишга имконингиз бўлмаса, оддий пахтадан фойдаланиш ҳам мумкин. Кераксиз пахтани яхшилаб зичланг-да, тешиклар орасига жойланг. Натижани мустаҳкамлаш учун рангсиз ёпишқоқ скочни пахта солинган тешик устидан ёпиштиринг. Мазкур усул ёрдамида вақтинчалик бўлса-да иссиқликни таъминлаш мумкин.
Ошхона эшиги
Кўп қаватли уйда яшасангиз, ошхона эшиги билан муаммо бўлмайди. Аммо ҳовлида яшайдиганлар учун совуқ ҳавода ошхонага югуриб кириб олиш яхши таниш. Айниқса, қор-ёмғирли кунларда ошхона эшиги очилиб-ёпилаверганидан хона ҳарорати ҳам пасаяди. Бироқ бу муаммонинг ҳам ечимини топса бўлади. Агар ошхона эшигининг пастки қисмида сезиларли даражада очиқлик бўлса, ўша қисмининг ўзига кераксиз палосдан ингичка қилиб кесиб, қоқиб қўйинг. Майда михдан фойдалансангиз, бажарган ишингиз кўркам бўлиб, эшик кўриниши бузилмайди. Гиламчани эшик ўлчамига мослашни унутманг. Йўқса, эшикнинг очилиб-ёпилиши қийинлашиши мумкин.
Пол
Оёқ таги иссиқ бўлса, совуқ ҳаво ҳам таъсир этмайди. Полингиз иссиқ бўлишини истасангиз, замонавий иситиш мосламаларини пол тагига ўрнатишингиз мумкин. Бироқ бунга шароитингиз бўлмаса, қўл остида бор нарсалардан фойдаланиб, вазиятдан чиқишни уддаланг. Мисол учун, оддий палос устидан гилам тўшанг. Бу усулни оила аъзоларингиз кўпроқ йиғиладиган хоналарда қўллаш мумкин. Овқатланиш хонаси учун оёқ тагига кераксиз палосдан кичик гиламчалар қирқиб, тўшанг. Қарабсизки, оёқ тагидан зах ўтмай, хона иссиқлиги таъминланади.
Иситгич қувурлари
Хонани яхшироқ иситиш учун иситгич қувурларининг орқа тарафига алюмин зар қоғоз (фольга)ни ёпишқоқ скоч ёрдамида ёпиштиринг. Шундай қилсангиз, иситгич қувуридан чиқаётган иссиқлик тўғри хона бўйлаб тарқалади.
Хоналарни иссиқ сақлаш учун…
Ҳар бир хона эшигини ёпиб юринг, лекин вақти-вақти билан хоналарни шамоллатиб туриш ҳам ёдингиздан кўтарилмасин. Хона ҳарорати алмашиниб турса, деворларда намлик тўпланмай, ҳарорат мўътадиллашади.
Иситгичлар
Иситгич танлашда уйнинг катталиги, хоналар миқдори ва интерьер кўринишини эътиборга олинг. Ахир харид қилган иситиш мосламаси хонага кўрк бериши керак. Ортиқча буюмдек ажралиб турса, хунук кўринади.
Манба: «SUG‘DIYONA» газетаси.
