Тинч ва осойишта турмуш тарзига эга бўлиш ҳақидаги кўплаб китоблар муаллифи бўлган ёзувчи Гретхен Рубин бахтли бўлиш сирларини қуйидагича изоҳлайди.
Атрофингизда ёқимли муҳит бўлсин!
Оилавий суратлар фақат фототўпламда туриши керак, деб ким айтди. Ўзингиз учун энг қадрли бўлганларини танлаб, жовонга, яқинларингиз йиғиладиган хоналарга қўйиб чиқинг. Бир-бирингизга бўлган меҳр-оқибатингиз хонадонингизнинг ҳар еридан таралиб турсин.
Ажойиб таклиф!
Кундалик тутинг. Ва унга бугун ёдингизда қолган энг ёқимли воқеаларни ёзинг. Ягона шарти жумла фақат битта гапдан тузилиши керак.
Миннатдорчилик билдиришни ўрганинг!
Турмуш ташвишлари билан ўралашиб, кичик ҳолатларнинг қанчалик муҳимлигини унутиб қўямиз. Биргина «раҳмат!» деган сўзнинг ўзиёқ муносабатларингизни қанчалик мустаҳкамлашини билсангиз эди. Умр йўлдошингиз, фарзандларингиз, қайнона-қайнотангиздан ҳам миннатдор бўлишни ўрганинг. Ва бу ҳақида ўзларига айтиб туринг.
Дўстлардан узоқлашманг!
Уй, иш, болалар... Дўст-дугоналар билан кўришмаслик учун баҳоналар етарли ва исталганча топилади. Бироқ вақти-вақти билан дилдан суҳбатлашиш учун айнан уларнинг даврасида бўлиш зарурияти ҳам пайдо бўлади-да. Қолаверса, бошқаларнинг ҳаётини кўриб, дунёқарашингиз ҳам кенгаяди.
Фото: встреча с друзьями
Атиги бир соат...
«Эртага бажараман» дея амалга ошмай қолган ишлардан кўпи йўқ. Хўш, бу қачонгача давом этади?! Тавсиямиз, бир кунда атиги бир соатни бажарилиши керак бўлган ишларга бағишланг. Рўйхат тузиб, режа қилган ишларингизни ёзиб қўйинг. Ва ҳар куни бир соатингизни уларга ажратишни одат қилинг.
Режали бўлинг!
Бугун қилиниши керак бўлган ишларни ён дафтарга ёзиб чиқинг. ҳатто, дам олиш кунлари учун ҳам шу тариқа режа тузишингиз мумкин. Болалар билан сайр қилиш, кино, музей ёки кутубхона. Ана шунда ҳаётингиз аста-секинлик билан изига тушади.
Стоп!
Бирор ким билан аразлашиб қолсангиз, кундан-кунга кортизол ва адреналин гормонларининг миқдори ортиб, стресс ҳолатига тушиб қоласиз. Аммо бунинг олдини олиш мумкин. Барча ташвишларни унутиш учун бир кун уяли алоқа воситасини ўчириб қўйинг, интернетга кирманг, ташқи оламдан буткул узоқлашинг. Бир кун минг кун эмас. Уддалайсиз. Фойдаси эса асабингиз тинчлангани бўлади.
