— Онамга стенокордия ташхиси қўйилди. Билишимча, хасталикнинг доимий кузатиладиган ва бирдан юракни сиқиб қолувчи турлари хавфли саналар экан. Шу ҳақида маълумот берсангиз.
Одил Каримов, Тошкент шаҳри
Нодира ҲАМРОЕВА, шифокор-терапевт:
— Асли стенокардиянинг ҳар қайси турида ўз вақтида муолажа олиш даркор. Хасталикнинг доимий безовта қиладиган турида кўкрак қафаси ва юракда бир хил оғриқ кузатилиши мумкин. Масалан, бемор жисмоний ҳаракат қилганда, узоқ масофага юрганда, зинадан юқорига кўтарилганида, асабийлашганида юрак соҳасини оғриқ қамраб олиши, безовталик бошланиши мумкин.
Аввалдан даволаниб юрган киши учун оғриқ хуружларининг юзага келиш эҳтимоли олдиндан аёнлик беради. Бундай пайтда бемор аҳволини енгиллаштириш учун дори воситаларидан фойдаланиши мумкин. Англаганингиздек, стенокардиянинг мазкур турини пайқаш мумкин, демак, бу у қадар хавфли эмас. Касалликнинг бирдан қўзғаладиган тури эса анчайин хавфли ҳисобланади. Кутилмаганда бошланган хуруж бирдан кучайиб, бемор ҳаво етишмаётганидан қийналади. Стенокардиянинг бирдан хуруж қилиши қон томирларда тиқинлар пайдо бўлишини келтириб чиқариши ҳам эҳтимолдан холи эмас.
Юракни сиқувчи стенокардия инсульт ёки юрак инфарктини келтириб чиқариши билан эътиборга молик ва ўз вақтида тўлиқ даволаниши шарт, дейилади. Онангизда стенокордиянинг қай бир тури аниқланганидан қатъи назар, шифокор буюрган дори воситаларини қабул қилишига аҳамият беринг.
