Ҳар бир ота-она соғлом фарзандни дунёга келтиришни истайди. Аммо баъзида бунинг учун хоҳишнинг ўзи камлик қилиши мумкин. Болажоннинг саломатлиги эса кўп жиҳатдан ота-онанинг соғлиги ва руҳий ҳолатига боғлиқ. Шундай экан, янги меҳмоннинг келишига алоҳида тайёрланишингизга тўғри келади. Бу борадаги тавсияларни эса олий тоифали шифокор-гинеколог Нилуфар БЎСТОНОВА бериб ўтади.
Аёллар учун текширувлар тартиби:
- Гинеколог кўриги. Фарзанд кўришни режалаштираётган ҳар бир аёл, аввало, шу шифокор кўригидан ўтиши шарт. Хоҳ биринчи ҳомиладорлик, хоҳ иккинчи ёки учинчиси бўлсин. Кейин шифокор кўрсатмасига мувофиқ, тор доирадаги бошқа мутахассисларга мурожаат қилишингиз мумкин.
- Қалқонсимон без фаолияти текшируви. Бўйиндаги кичкинагина капалакни эслатувчи без жинсий аъзолар, шунингдек, аёл репродуктив саломатлигига таъсир қилади. Текширув учун ЭНДОКРИНОЛОГга учрашасиз.
- Ультратовуш текшируви. Бу амалиёт жинсий аъзонинг ҳолати, ундаги ўзгаришлар ҳамда ўлчамини аниқлайди. Текширув учун УТТ МУТАХАССИСИга юзланасиз. УТТ ҳайз циклининг турли фазаларида амалга оширилиши мумкин. Масалан, эндометрия(бачадон ички пардаси)нинг ҳолатини аниқлаш талаб этилса, ҳайз тугагагандан кейин, овуляция жараёнини ўрганиш учун эса ҳайз циклининг ўрталарида (20-24 кунлар орасида) текширувдан ўтказиш тавсия этилади.
- Жинсий йўл билан юқувчи инфекциялар учун қон таҳлили. Таҳлил топшириш учун гинеколог йўлланмаси билан ИНФЕКЦИОНИСТ ҳузурига йўл оласиз.
- Гормонал текширувлар. Агар эндокринолог бирор ўзгаришни қайд этса ёхуд гинеколог тавсия қилса, гормонлар таҳлил ўтказилиши мумкин. Мазкур таҳлил учун қон намунаси топширилади.
- Стоматолог кўриги. Ҳа, айнан режалаштириш чоғида тишларингизни текширтиринг. Зарур бўлса даволатинг, тешикларини яматинг. Токи нозик паллага қадам қўйганингиздан кейин стоматолог аралашувига ўрин қолмасин. Ҳомиладорлик чоғида кальций етишмовчилиги юзага келиб онанинг тишлари тўкилиши, мўртлашиши мумкин. Касалликни даволагандан кўра олдини олган анча осон-да!
Эркаклар учун текширувлар тартиби:
- Уролог кабитенига кирасиз. Айнан шу шифокор саломатлигингизни текшириб, жинсий йўл билан юқувчи инфекциялар йўқлигига ишонч хосил қилиши лозим. Бунинг учун эса таҳлил топшириш тавсия қилинади. Гарчи бирор марта ҳам бундай хасталиклар билан оғримаган бўлсангиз-да, албатта текширувдан ўтинг. Ахир гап наслингизнинг давомчиси соғлом дунёга келиши ҳақида бормоқда.
- Спермограмма — сперманинг таркиби ва фаоллигини аниқловчи таҳлил. Ушбу таҳлил ҳам тайёргарликни талаб этишини ёдингизда тутинг. Агар текширувга 3-4 кун қолганида алкоголь, энергетик ичимликлар, баъзи тинчлантирувчи ва оғриқ қолдирувчи дориларни қабул қилган бўлсангиз, натижа хато чиқиши мумкин.
- Қон таркибидаги гормонлар миқдори — бу таҳлил тестостерон миқдорини аниқлайди. Тестостерон миқдорининг камлиги ҳам ҳомиладорлик юз бермаслигига сабаб бўлиши мумкин.
- Простата бези секрецияси — шифокор простата безида яллиғланиш ёки без фаолиятида ўзгариш борлигига шубҳа қилса, без секрецияси тўпланиб, таҳлилга юборилади.
- УТТ — жинсий аъзо УТТси икки хил усулда амалга оширилади. Қай биридан фойдаланиш муаммонинг турига қараб, шифокор томонидан тавсия этилади.
- зарур ҳолларда эркак спермасининг қўшимча таҳлили ҳам бажарилиши мумкин.
Шунингдек, олти ой давомида ҳомиладорлик содир бўлмаса мутахассис қўшимча таҳлилларни тавсия қилиши мумкин.
Мафтуна тайёралади.
Манба:
«Sug'diyona» газетаси
