Ўзбекистон U-19 ёшлар терма жамоаси мураббийлар штабида ўзгариш юз берди.
Шу кунгача, Ўзбекистон Олий Лигаси вакили ҳисобланган Самарқанднинг «Динамо» клубини бошқариб келган Равшан Ҳайдаров Ўзбекистон U-19 терма жамоасининг янги бош мураббийи этиб тайинланди. Бу ҳақда ЎФФ расмий сайти хабар бермоқда.
Эслатиб ўтамиз, 3 июнь куни Сергей Лушан Ўзбекистон U-19 ёшлар терма жамоаси бош мураббийи вазифасидан озод қилинган эди. ЎФФ Мураббийлар Кенгаши Ўзбекистон U-19 терма жамоасининг янги бош мураббийи сифатида Равшан Ҳайдаров номзодини тасдиқлади. Ҳайдаров ёшлар терма жамоасини шу йилнинг октябрь ойида Мьянмада бўлиб ўтадиган ёшлар ўртасидаги Осиё Чемпионати баҳсларига тайёрлайди.
Шунингдек, Ўзбекистон U-16 ўсмирлар терма жамоаси мураббийлар штабида ҳам бир қатор ўзгаришлар юз берди. Шу кунгача терма жамоани бошқариб келган Темур Олимхўжаев Ўзбекистон U-16 ўсмирлар терма жамоаси бош мураббийи вазифасидан озод этилди.
Темур Олимхўжаев эндиликда 2000 ва ундан кейинги йилларда туғилган ўсмирлар (U-14) терма жамоасини бошқаради. 1998 ва ундан кейинги йилларда туғилган ўсмирлар терма жамоасига эса, Александр Мочинов бош мураббий этиб тайинланди.
Александр Мочиновга Ўзбекистон U-16 ўсмирлар терма жамоасини шу йилнинг сентябрь ойида Таиландда бўлиб ўтадиган Осиё Чемпионатига муносиб тайёрлаш вазифаси юклатилган.