Минг афсуски, ёнғин хавфсизлиги қоидаларига риоя қилмаслик юқоридаги каби оғир оқибатларга олиб келиши мумкинлигига айрим юртдошларимиз етарли эътибор қаратмаяпти, деб ёзмоқда ЎзА.
Жумладан, Балиқчи туманидаги “Кўл” маҳалласида яшовчи Шуҳратбек Саидов хонадонида пропан газ баллонига уланган иситиш печининг носозлиги, газ ҳидининг сизиб чиқиши ва буни сезмасдан хонадон соҳиби олов ёқиши натижасида чақнаш содир бўлган. Бунинг оқибатида нафақат унинг ўзи, балки ўша пайтда уй ичида бўлган қизи Шоҳиста Сиддиқова ҳам куйиб, тан жароҳати олган.
Шунингдек, Андижон шаҳридаги “Наврўз” маҳалласида яшовчи Мухторжон Муҳитдинов эса пропан газ баллонидаги газ қолдиғи – газолинни ерга тўкаётган вақтда 5-6 метр узоқликда ёнаётган оловдан аланга олиб, чақнаш юзага келган. Натижада уй соҳиби куйиб, тан жароҳати олган.
– Ёнғин хавфсизлиги хизмати ходимлари томонидан олиб борилаётган профилактика ва тушунтириш ишлари, кўрилаётган чора-тадбирларга қарамасдан, айрим фуқароларни ёнғин хавфсизлиги қоидаларига риоя қилмасликлари оқибатида жорий йилнинг ўтган даврида вилоятда газ баллони билан боғлиқ 6 та ана шундай ҳолат содир бўлиб, 7 нафар фуқаро куйиб, тан жароҳати олган, – дейди Андижон вилояти ИИБ Ёнғин хавфсизлиги бошқармаси катта муҳандиси Азизбек Ёрқулов. – Бундан ташқари, воқеа содир бўлган хонадонлар катта миқдорда моддий зарар кўрган.
"Содир бўлган ёнғинлар таҳлил қилинганда, баъзи ҳолларда фуқароларнинг газ баллонларидан нотўғри фойдаланиши, газ печларининг носозлиги, газ баллонларини ишлатишда ёнғин хавфсизлиги қоидаларига амал қилмаслик сабаб бўлгани аниқланган.
Юқоридаги каби кўнгилсизликлар келиб чиқмаслиги учун фуқаролар ҳамиша ҳушёр бўлиши, ёнғин хавфсизлиги қоидаларига қатъий амал қилишлари зарур", - дейилган хабарда.
