Бугунги кунда юртимизда ҳар бир соҳага, жумладан спортга ҳам улкан эътиборлар қаратилмоқда. Хусусан, чекка ҳудудларда ҳам янгидан, замонавий тарзда бунёд этилаётган футбол майдонлари, сузиш ҳавзалари, спорт иншоотлари сўзимизнинг яққол исботидир. Ватанимизнинг юрагида ўти бор ёшлари ҳам, спорт юзасидан кўз кўриб, қулоқ эшитмаган натижаларни қайд этишмоқда.
Руслан Нуриддинов, Ҳасанбой Дўстматов, Рустам Қосимжонов, Миржалол Қосимов, Фазлиддин Ғойибназаров, Сарвиноз Қурбонбоева сингари спортчиларимиз орқали дунё таниётган ва тан бераётган миллатимизга бўлган эътибор ҳам, қизиқиш ҳам кундан кунга юксалмоқда. Бир сўз билан айтганда спорт, дунёнинг кучли ёшларини, кучлиларини ўз атрофида бирлаштирмоқда. Ана шундай кучлиларни бирлаштириш мақсадида Қозоғистон Республикаси Акмола вилоятидаги «Мен чемпионман» халқаро телевизион спорт мусобақаси ҳам мезбон Республиканинг 13 та, Россиянинг 2 та, Ўзбекистоннинг ягона жамоаларини том маънода бирлаштирди.
12-14 ёшдаги спортчи болажонлар ўртасида ташкил қилинган мусобақа 18-21 ноябрь кунлари бўлиб ўтди. Мусобақада мамлакатимиз шанини Сирдарёлик ёшларнинг ҳимоя қилишлари эса, бизга улкан қувонч бахш этди. Ўзбекистон ёшлар иттифоқи Сирдарё вилоят Кенгаши раиси Шавкат Зайниддинов раҳбарлик қилиши белгиланган жамоани 17-ноябрь куни Гулистон шаҳридаги «Юрт байроғи» майдонида кузатиш маросими ташкил қилинди. Ана шу чоғлардаги воҳадошларимизнинг, маросим иштирокчиларининг ҳаяжонини Сизга етказишга очиғи ожизлик қиламиз. Дуога қўл очиб, менинг фарзандим ёхуд воҳадошим албатта ғолиб бўлиб, юзимизни ёруғ қилиб келади, дея ният қилган ота-оналарнинг, нуронийларнинг сийратидаги қувончлари чексиз эди. Улкан шодиёна орқали кузатилган жамоамиз, улкан натижаларга эришди.
Келинг, умумий гаплардан сал йироқлашган ҳолда аниқ маълумотларни Сизга илинсак.
Дастлаб 18 ноябрь куни бўлиб ўтган мусобақада Ўзбекистон ёшлар иттифоқи Сирдарё вилояти Кенгаши томонидан тузилган «Сайхун» жамоаси Қозоғистон Республикаси Павладар вилоятининг «Рекорд» жамоаси билан майдонга тушиб ғалаба қозониб, чорак финалга йўл олди. Яна бир қувонарлиси шундаки, спортчиларимиз 16 та жамоа ичида арқонда сакраш бўйича 1 дақиқада 75 та сакраб янги рекорд ўрнатишди.
19 ноябрь куни Сирдарёлик ёш спортчилар Қозоғистон Республикаси Астана шаҳрининг «Лидерлар» командаси устидан ғалаба қозониб ярим финалга йўлланмани қўлга киритиб, сирдарёлик «Сайхун» командаси раҳбари Ўзбекистон ёшлар иттифоқи Сирдарё вилояти Кенгаши раиси Шавкат Зайниддиновга «Энг яхши команда раҳбари» номинацияси билан бирга кубок тақдим этилди.
Шу ўринда вилоят Кенгаши раиси Шавкат Зайниддиновдан қўнғироқ қилиб, интервью олганимизда, улар ушбу қалб сўзларини баён қилдилар,
- Бугунги кубок нафақат Менга, балки бутун Ватанимга берилган Юксак рағбат деб, эътироф меваси деб биламан. Юксак тайёргарликлар учун ҳам жамоамиз мана бугунга қадар намунали иштирок этишмоқда. Ўзбекистонга, албатта кучли учталикдан бири бўлиб қайтишга ҳаракат қиламан.
Раиснинг сўзларидан сўнг, натижаларни интизорлик билан кутдик.
20 ноябрь куни сирдарёлик ёш спортчилар Қозоғистон Республикаси Ақмола вилоятини «Жўлбарслар» жамоаси билан майдонга тушдилар ва бу ўйинда мағлуб бўлишди. Шундан сўнг 3-ўрин учун бизни ёш спортчиларимиз Астана шаҳри ёшлари билан майдонга тушиб ғалаба қозонишди.
Ёш спортчиларимиз Қозоғистон Республикаси, Акмола вилояти, «Бурабай» дам олиш масканида ташкил этилтган «Мен чемпион» Халқаро телевизион спорт мусобақасида муносиб иштирок этиб, умумжамоа ҳисобида фахрли 3-ўрин билан ватанимизга қайтишди. Уларни Тошкент шаҳридаги аэропортида кутиб олиш маросими бўлиб ўтди.
Тошкентдаги «Ислом Каримов» номидаги халқаро аэропортда кутиб олинган жамоамиз аъзоларининг қувончлари чексиз эди. Айниқса, севинч ёшларини артаётган ота-оналарни кўриб, биз ҳам икки хисса тўлқинланиб кетдик.
- Бугун фарзандим Шаҳризода жамоадошлари билан Қозоғистонда кучлилар қаторида бўлиб, умумжамоа ҳисобида учинчи ўринни олишга Мушарраф бўлди. Худди қизим эмас, бориб мен ўша майдонда югургандек ҳаяжондаман. Ниятим, спортчиларимиз ҳамиша зафар қучишдан чарчашмасин, - дейди Шаҳризоданинг меҳрибон онаси.
Муносиб кутиб олинган ва ғолиблик шодасини тақиб келган Сирдарёлик спортчилатимизнинг ҳар бирига, тўйга тўёна деганлари каби, вилоятимиз ҳокими Ғафуржон Мирзаев 1.000.000 сўмдан пул мукофотларини топширди. Ниятимиз Ана шундай спортчиларимиз сони кундан кунга кўпайиб бораверсин. Олға Ўзбекистон. Олға спортчи Сирдарёлик ёшлар.
