Peel- келажакда Буюк Британияда ишлаб чиқариладиган энг митти автомобиль бўлиб, унинг эни - 1,04м, бўйи эса - 1,4м ни ташкил этади. 60-йилларда лойиҳаси тузилган ушбу машина яқин кунларгача, яъни икки нафар британиялик тадбиркор унга электр мотор ўрнатиб, ишга туширгунга қадар коллекционерлар учун қимматбаҳо экспонат ҳисобланар эди. Мазкур моделнинг максимал тезлиги ўртача 55 км/с бўлгани боис, унда халқаро трассаларда кезишнинг иложи йўқ.
Шунга қарамай, у азалдан шаҳар транспорти сифатида ишланган эди: жажжи, енгил бошқарилади, тўхташ жойига қўйиш ҳам осон. Ҳозирда унинг ичига катта қувват талаб этмайдиган мопеднинг мотори ўрнатилган. Унинг оғирлиги 15 кг га яқин бўлиб, Tesla Model S. автомобили моторидан қарийб 15 маротаба кичик. Ишлаб чиқарувчилар уни орқа ғилдираклар устига ўрнатишгани сабаб, қўшимча захира батареялар учун ҳам жой етарли. Peel Trident моделида бир вақтнинг ўзида ушбу батареяларни ҳам улаб, 130 км йўлни қайта қувватлантирмасдан босиб ўтиш мумкин экан.
Илгари машина бундан-да енгилроқ бўлган: орқага ҳаракатлантирувчи механизми бўлмаган, шунинг учун ҳайдовчи юкхонадаги махсус тутқич билан автомобильни кўтариб, керакли жойга судраб олиб боришига туғри келган(59 кг оғирлик учун бу иш унча қийин кечмайди).
Машиналарни чекланган миқдорда ишлаб чиқариш кўзда тутилмоқда, шунда у ўз қийматини ва ноёблигини сақлаб қолади. Мухандислар ҳар бир нусхани қўлда йиғиб, синчиклаб синовдан ўтказадилар.
Миттигина уч ғилдиракли Elio автомобиллари кейинги йилдан кенг оммага тақдим этилади. Шунингдек, Lit Motors компанияси бир ўринли транспорт воситасини лойиҳалаштирмоқда: техник томондан олиб қаралганда, бу мотоцикл, аммо кўриниши Peel моделига ўхшаш. Буни улкан тараққиёт дейиш мумкин, чунки шу каби жажжи машиналар кўп миқдордаги энергияни тежаб, атроф-муҳитга нисбатан салбий таъсир кўрсатмайди.
Манба: www.thinkgreen.ru
