Бугун – 20 декабрда Нодавлат Электрон Оммавий Ахборот воситалари Миллий ассоциациясининг “Naesmi Media Hall”ида “Янги Ўзбекистон – янги сайловлар ” мавзусида очиқ мулоқоти бўлиб ўтди.
Мулоқотни “Халқаро пресс-клуб” раиси Шерзодхон Қудратхўжаев ва ХПК ижрочи директори Жалолиддин Усмонов олиб борди.
Спикерлар Ўзбекистон Республикаси Олий Мажлиси Сенати раисининг биринчи ўринбосари Содиқ Сафоев, Ўзбекистон Республикаси Ташқи ишлар вазирининг биринчи ўринбосари Илҳом Неъматов, Марказий Сайлов комиссияси раисининг ўринбосари Маҳмуд Истамов ҳамда “Юксалиш” умуммиллий ҳаракатининг раиси Акмал Бурҳонов журналистларни қизиқтирган саволларга жавоб беришди. Мулоқот жонли эфирда “MY5“ телеканалида намойиш этилди.
Очиқ мулоқотда юртимизда бўлиб ўтадиган сайлов жараёнларини кузатиш учун ташриф буюрган хорижий экспертлар ҳам иштирок этди. Мулоқот сўнгида уларнинг Ўзбекистондаги сиёсий жараёнлар, уларни ташкиллаштиришга, демократия ва ошкораликка муносабати, аввалги сайловларга нисбатан ўзгаришлар, биздаги жараёнларни уларнинг мамлакатидаги сайловлар атмосфераси билан солиштирганда фарқли жиҳатлари ҳақдаги фикрлари билан қизиқдик.
Бублик Владимир Александрович, Урал давлат юридик университети ректори, Россия:
–Мен Ўзбекистонда аввалги йилларда бўлиб ўтган сайловларда иштирок этмаганман, аммо ОАВда жараёнлар қандай бораётганини кузатиб борганман. Келганимга икки кун бўлган бўлса, шу икки кун ичида ҳамма нарса очиқ ва шаффофлигини кўряпман. Ҳозирча минус томонларини кўрмадим. Ўйлайманки, сайлов куни одамларда фақат байрамона кайфиятнимас, даҳлдорлик ва масъулиятни кўрамиз. Фуқаролар, албатта, сайловга ўз хоҳиши билан келади, ўзи хоҳлаган номзодни сайлайди ва кейин ўша депутатдан фаол ва самарали ишлашни талаб қилади.
–Аввалги ва ҳозирги жараёнларни кузатиб бораётган бўлсангиз, қандай ўзгаришларни кўрдингиз?
–Ўзбекистонда бу йилги сайлов олди тадбирларида аввалгиларга қараганда ташкилотчилик, демократик ёндашувлар бирмунча кучлилигини, партиялар ҳам сайловчилар ҳам анча фаоллигини кўрдим. Мана, бугунги оммавий тадбирда ҳам иштирок этдим. Дискуссион клуб шундай жойки, унда сиёсатчилар, иқтисодчилар, давлат арбоблари ҳамда фуқароларни ўйлантираётган саволлар билан ҳамма бемалол мурожаат этиши, ўз фикрини айтиши мумкин. Очиқ мулоқотлар шундай ошкоралик ва оммавийлик касб этаётганидан хурсандман.
–Сиздаги дебатлар ва сайлов олди жараёнларида бизлардаги жараёнлар билан солиштирганда қандай фарқли жиҳатлар бор?
– Мен ўзимиздаги мулоқотларда нисбатан танқидий фикр-мулоҳазалар кўпроқ деб айтган бўлардим. Бизда аҳоли ҳукуматга, номзодларга, депутатларга нисбатан қаттиқроқ, талабчанроқ, очиқроқ муносабатда бўлишади. Сизларда менталитет балки шунга хос, бу одамларнинг депутатларга ҳурмати, бироз юмшоқроқ мурожаатларида кўзга ташланади. Бундан ташқари, менимча бизда сиёсий партиялар кўпроқ ва улар мўйсафид ёшда. Шу боис сиёсий кураш тажрибаси ҳам бирмунча жиддийлиги билан фарқ қилса керак.
Аммо сизларда ҳам оппозиция жадаллашяпти. Ўйлайманки, маълум вақт ўтиб оппозицион партия ўз манфаатлари ҳақида бор овози билан бонг уради. Майли, сиёсий кучлар ўзаро беллашсин, шу рақобатда сайлов соҳасидаги монополияларга ҳам чек қўйилади.
–Сизлардаги сиёсий дебатлар қандай ўтади? Уларда аҳоли вакиллари ҳам иштирок этадими?
–Бизда, тўғрисини айтсам, дебатлар ва турли ток-шоулар керагидан ортиқ кўпайиб кетган десам ҳам бўлади. Шунингдек, сиёсий дебатлар фақат сайлов олдидан ўтказилмайди, улар йил бўйи давом этади, марказий каналлар орқали бериб борилади. Уларда, албатта, оддий аҳоли ҳам томошабин сифатида иштирок этади. Лекин мен кўп гапиргандан кўра, кўп ишлаган яхши, деган бўлардим. Бизда жуда кўп гапиришади... Бу ерда эса кўп гапиришмаса ҳам, кўп ишлашади деб ўйлайман. Чунки халқингиз жуда меҳнаткаш халқ.
Манзура Бекжонова суҳбатлашди.
ꈝ
