Бугун Олий Мажлис Сенати Раиси Танзила Нарбаева ЕХҲТ Парламентлараро Ассамблеяси (ПА)нинг Георгий Церетели бошчилигидаги делегацияси билан учрашди.
Делегация парламент сайловида иштирок этиш учун Ўзбекистонга ташриф буюрган. Таъкидланганидек, ЕХҲТ Парламент Ассамблеяси Ўзбекистон Олий Мажлис Қонунчилик палатасига сайловни кузатиш учун ташкилотнинг иштирокчи давлатларидан 50га яқин парламент вакилларини илк бор юборган.
Бўлажак сайлов хусусида сўз борар экан, томонлар сўнгги 3 йил давомида мамлакатда амалга оширилаётган ислоҳотлар муқаррарлиги жиддий синови ва тасдиғи бўлмиш сайловларга ҳар томонлама тайёргарлик олиб борилганини таъкидлаб ўтди. Янги Сайлов кодекси мазкур соҳада аввал амал қилган бешта қонуннинг қоидаларини ўзида мужассамлаштирган. Бунда халқаро кузатувчиларнинг сайлов жараёнини такомиллаштириш бўйича тавсиялари ҳам инобатга олинган.
Георгий Церетели таъкидлаганидек, бўлиб ўтадиган сайловлар Ўзбекистоннинг сиёсий тарихидаги энг муҳим воқеа ҳисобланиб, ЕХҲТ томонидан бунга катта қизиқиш билдирилмоқда. “Бу борада ЕХҲТнинг тавсиялари ҳисобга олингани ва қонунчиликда ўз аксини топгани бизни қувонтиради”, - деди Г.Церетели.
Эслатиб ўтамиз, ЕХҲТ Парламент Ассамблеяси 1993 йилдан бери сайловларни кузатиб боради. Бугунги кунга қадар у қарийб 30 та аъзо давлатларнинг, жумладан Буюк Британия, АҚШ, Германия ва Франция сайловларини кузатиб борган.
Ўзбекистонда бу йилги парламент сайловини илк бор ЕХҲТ ДИИҲБнинг тўлақонли миссияси кузатиб бормоқда, у ўз ишини жорий йил 25 ноябридан бошлаган.
