Бир неча кун аввал сайтимизда "Самарқандда 63 ёшли киши уриб-дўппосланди” номли мақола ва видео эълон қилинган эди. Ушбу воқеа юзасидан изоҳ ИИВ ҳузуридаги Тергов департаменти изоҳ берди.
Унда айтилишича 29 март куни тахминан соат 02:30 да 32 ёшли Азиз Т. Самарқанд шаҳрида жойлашган “Табиат-саховат” деҳқон бозори олдида жойлашган дўкон олдига келиб, шу дўконда норасмий қоровул бўлиб ишлаган фуқаро –63 ёшли Хусинали М.га қорни очганлигини ва унга “хот-дог” тайёрлаб беришини айтади. Аммо Хусинали М. унга дўкон карантин сабабли ёпиқлигини айтганидан сўнг, у билан жанжаллашиб қолиб, Хусинали М.ни қўл ва оёқлари билан қасддан уриб-дўппослаб оғир тан жароҳати етказган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан фуқаро Азиз Т.га нисбатан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.
Жиноят иши бўйича Азиз Т.га Жиноят кодексининг 104-моддаси 2-қисми “в” банди (ўта шафқатсизлик билан, қасддан баданга оғир шикаст етказиш) билан айблов эълон қилиниб, “қамоққа олиш” тарзидаги эҳтиёт чораси қўлланилган. Ҳозирда дастлабки тергов ҳаракатлари давом эттирилмоқда, дейилади хабарда.
