Унда жорий йилда тадбиркорлик лойиҳаларини қўллаб-қувватлаш учун 10 триллион сўм ресурс ажратилиши маълум қилинди.
Қайд этилишича, ушбу маблағлар ҳисобидан 185 минг нафар аҳолини иш билан таъминлаш, ишсизлик даражасини 4,6 фоизгача, камбағалликни эса 3 фоизгача қисқартириш режалаштирилган. Шунингдек, Гулистон, Ширин, Янгиер шаҳарлари ҳамда Сардоба, Сайхунобод, Сирдарё ва Ховос туманларини ишсизлик ва камбағалликдан холи ҳудудга айлантириш чоралари кўрилади.
Йиғилишда қайд этилганидек, ўтган йили вилоят иқтисодиёти 9,8 фоизга ўсган. 42 та йирик инвестиция лойиҳаси амалга оширилиб, 333 миллион доллардан зиёд сармоя ўзлаштирилган ва 17,5 мингдан ортиқ янги иш ўринлари яратилган.
Жорий йилда вилоятга 3 миллиард доллар инвестиция жалб қилиш, экспорт ҳажмини 500 миллион долларга етказиш вазифаси қўйилди. Шунингдек, ижтимоий инфратузилмани яхшилаш, ичимлик суви ва электр таъминотини кенгайтириш, қишлоқ хўжалигида сув тежовчи технологияларни жорий этиш бўйича аниқ топшириқлар берилди.
Президент ҳар бир лойиҳа аҳоли даромадлари ва турмуш даражасида амалий натижа бериши шартлигини таъкидлади.
