ШУ ЙИЛНИНГ ЁЗИДА ХАЛҚАРО ФУТБОЛДАГИ ЭНГ ШОВ-ШУВЛИ ВОҚЕА ИСПАНИЯ ТЕРМА ЖАМОАСИ ВА “БАРСЕЛОНА” КЛУБИ САРДОРИ ХАВИ ЭРНАНДЕСНИНГ ҚАТАРНИНГ “АЛ-САДД” ЖАМОАСИ САФИГА БОРИБ ҚЎШИЛГАНИ БЎЛДИ. ЧУНКИ УЗОҚ ЙИЛЛАР ДАВОМИДА ХАВИ КАТАЛОНИЯ КЛУБИГА БЕМИННАТ ХИЗМАТ ҚИЛИБ КЕЛДИ. ОЛДИНИГА ЮЗАГА КЕЛГАН ШОҲОНА ТАКЛИФЛАР ҲАМ ХАВИНИ ЎЗГАРТИРМАГАН ВА “БАРСЕЛОНА”ГА СОДИҚ ЭКАНЛИНИНИ ИСБОТЛАБ КЕЛГАНДИ. НИМА БЎЛДИ-Ю, ХАВИ ИСПАНИЯНИ ТАРК ЭТИБ, ОСИЁГА ЙЎЛ ОЛДИ. ХЎШ, УНИНГ БУ ЙЎЛНИ ТАНЛАГАНИГА НИМА САБАБ БЎЛДИ? КЕЛИНГ, ЯХШИСИ БИЗ ҲАМ “БАРСЕЛОНА”НИНГ ТИРИК АФСОНАСИГА ОИД АЙРИМ ҲАҚИҚАТЛАРГА ТЎХТАЛАМИЗ...
ТЎП ТЕПИШ УЧУН ДУНЁГА КЕЛГАН
Хави туғилганида 3,4 кг тош босган, бўйи 49 см бўлган. Хави Эрнандеснинг ота-онаси Хоаким Эрнандес ва Мария Мересалар оилада тўрт нафар фарзандни тарбиялаган. Улар орасида қаҳрамонимиз энг кичиги эди. Унинг Алекс ва Оскар исмли акалари ҳамда Ариандна исмли синглиси бор эди. Айтишларича, болакай 9 ойлигидаёқ юриб кетган. Уч ёшида эса илк маротаба тўпни қўлига олган.
“Футболни танлашимни оиламдагилар кўпроқ исташган. Шу боисдан бўлса керак, 6 ёшимда онамнинг ўзи бувамга қарашли “Сан Хосеп” футбол клуби машғулотларида иштирок этишимга руҳсат олиб берган. Айнан шу футбол клуби менинг ҳаётимни бутунлай ўзгартириб юборган. Негаки, миллионлар ўйинига бўлган қизиқиш айнан шу маскандан янада куртак ота бошлаган. Кейинчалик англаб етдимки, ҳаётимни футболга бағишлаганим яхшироқ. Онам ҳам мени тўп тепиш учун дунёга келганимни айтган”, - дея болалигини хотирлайди Хави Эрнандес.
9 ёшида Хавини “Терраса” футбол мактабига қабул қилишади. Майдонда бошқа тенгқурларидан ажралиб турарди. Чунки унинг бўйи жуда паст бўлишига қарамай, тўпни яхши назорат қилиши, шерикларига аниқ тўп ошириши билан мураббийларнинг назарига тушиб қолади. 10 ёшида эса ўзининг дастлабки мусобақаси – болалар ўртасидаги шаҳар кубогида ғолиб чиқади. Ҳаттоки, турнинг энг яхши футболчиси номини олиб, 25 еврога тенг пул мукофотига сазовор бўлади. Эътиборлиси, қаҳрамонимиз дастлабки гонорарига онасига тостер сотиб олади.
“Миллионлар ўйини орқали оиламнинг яхши шароитда яшашини таъминлай олишимга ишонардим”, - дейди Эрнандес.
“БАРСЕЛОНА”ДА ТАНИЛИБ, ҚАТАРГА ЙЎЛ ОЛГАН МАЭСТРО
Футболчининг олтин йиллари “Барселона”да ўтди. Каталонияликлар билан кўплаб унвонларга эга чиқди. Клуб миқёсидаги барча мусобақаларда зафар қучди. Шунингдек, Испания миллий терма жамоасида ҳам кўплаб ютуқларни қўлга киритди. Жаҳон чемпиони, Европа Кубогининг икки карра соҳиби бўлган Хави футболчи сифатида юксак марраларни забт эта олди.
2015 йилнинг ёзида Хавининг “Барселона” билан шартномаси муддати ўз ниҳоясига етди. Шундан сўнг клуб томонидан янги таклиф тушганига қарамай, Хави кетмоқчи эканлигини ошкор қилди. Бу орада унга АҚШ, Хитой, Ҳиндистон, Қатар сингари мамлакатларда таклифлар келиб тушганди. Узоқ вақт ўйлаб кўрган Хави Қатар вариантига тўхтатди. У “Ал Садд” билан шартнома тузди. Албатта, келишувнинг молиявий томонлари футболчини тўлақонли қониқтирди. Натижада, у Қатар Юлдузлар лигасига йўл олди.
“Қачондир фаолиятимни “Барселона”да тугатишим мумкин эди. Мен ўз жойимни бошқаларга бўшатиб беришни лозим топиб, тарк этдим. Қатар мен учун қизиқарли таклиф бўлиб кўринди. Албатта, Европани тарк этиб, бошқа қитъага йўл олганимни кўпчилик пул билан боғлаши мумкин. Тўғри, яна бир неча йиллардан кейин, фаолиятимни тугатишим мумкин. Чунки футболчилик бир умрлик касб эмас. Айни дамда келажагимни таъминлашим ҳам керак деган фикрга келиб бўлдим. Буни клубдагиларга тушунтирдим. Мен “Барселона”ни фақат яхши хотиралар билан тарк этдим. Ажойиб йиллар, унвонлар учун раҳмат айтмоқчиман”, - дейди Хави.
Ҳозирда қаҳрамонимиз Қатар Юлдузлар лигасининг энг катта маош оладиган футболчиларидан бири ҳисобланади.
ҲАМОН УЙЛАНМАГАН, АММО БАХТЛИ
Хави Эрнандес ҳамон уйланганича йўқ. 35 ёшни қарши олганига қарамай, у бўйдоқлик билан хайрлашишни ҳаёлига ҳам келтирмаяпти. Сабабни ошкор қилишни истамайди. Шунга қарамай, унинг ўз “иккинчи ярми” бор. Эътиборлиси, Хави бошқа футболчиларнинг рафиқалари ёки маъшуқаларига ўхшаб таниқли актриса ёки модель эмас, каталониялик оддий қиз билан бахтли яшаб келмоқда. Унинг исми Эльза Эгеа. Уларнинг муносабатлари узоқ йилларга бориб тақалади. Эльза талабалик йиларидаёқ Хави билан тақдир ришталарини боғлаган. Бироқ улар расман никоҳда ўтишмаган.
“Айни пайтда мен Эльза билан жуда бахтлиман. У менинг ёнимда бўлса, бўлгани. Йирик мусобақаларда Эльза ҳам стадионга келиб, мени қўллаб-қувватлайди. Табиийки, бу менинг кучимга қўшимча куч беради”, - дейди Хави.
УЙҚУЧИ, ШОКОЛАДХЎР, ТАДБИРКОР ИНСОН
Хавининг ҳар бир соҳада фаолият юритишни ёқтирадиган инсонлардан бири сифатида кўрсатиш мумкин. Унинг каталонияда хусусий фирмаси бор. Яъни, қурилиш маҳсудотларини ишлаб чиқаришга ихтисослашган. Шунингдек, шаҳсий маблағига “Campus Xavi” деб номланган футбол мактабини ҳам ташкил этган. Бу ерда 200дан ортиқ болакайлар футбол сир-асрорларини ўргатишади.
Хавинин энг ёмон одатларидан бири – кўп ухлашидир. Бўш вақтини топилди дегунча, ухлашни афзал билади.
2009 йилда Хави 20 минг нусхада “Менинг ҳаётим – “Барса” китобини нашрдан чиқарганди.
Шоколадни ёқтиради ҳамда доимий равишда сафар олдида ўзи билан шу ширинликни олиб юради. Қолаверса, шоколад фабрикаси билан келишувига кўра, реклама қилади ҳамда яхшигина даромад топади.
“Доимо инсонларни ҳурмат қилишга одатланганман. Ўзим турли соҳаларга қизиқаман. Чунки ҳаётим ранг-баранг бўлишини истайман”, - дейди Хави.
Хавининг “Барселона”дан кетиши ҳақида ҳамкасблари ҳам турлича фикр билдиришди
Лионель Месси, “Барселона” етакчиси: “Хави билан биз ажойиб йилларни ўтказдик. У мен учун буюк ижрочи сифатида қолаверади. Асосийси, Хави билан кўплаб унвонларга эга чиқдик. “Барселона”дан кетгани яхши бўлмади. Шунга қарамай, у жамоамизнинг тирик афсонаси бўлиб қолаверади”.
Андреас Иньеста, “Барселона” футболчиси: “Унинг Қатарга йўл олгани мени карахт ҳолга солди. Хавини “Барселона”ни тарк этишини ҳеч қачон тасаввур қилмаганман. “Реал” таклиф билан чиқса ҳам, ҳеч қачон унинг жамоани ташлаб кетишини кутмагандим. Барибир унинг қарорини ҳурмат қиламиз. Буюк ижрочи билан тўп сурганимдан фаҳрланаман”.
Икер Касильяс, “Порту” дарвозабони: “Биз у билан яқин дўстмиз. Шуни айта оламанки, Хави нега Қатарга йўл олди. Буни ўзи билади. Қолаверса, унинг қарорига биз қарши бора олмаймиз. Ишонаманки, у қайси мамлакатда футбол ўйнашидан қатъий назар, жаҳоннинг энг зўр ярим ҳимоячиси эканлигини унутишмайди”.
