Namangan tumani maishiy va servis xizmati ko`rsatish darajasi bo`yicha viloyatda Namangan shahridan so`ng 2-o`rinda turadi. Bu esa o`z-o`zidan xizmat ko`rsatish sohasiga talab borligidan dalolat beradi. Ammo bitta muammo bor: Tadbirkor bir narsa quray desa, joy yo`q. O`zboshimchalik bilan qurib olsa, kelib buzib ketishadi. “snos” masalasi oxirgi paytlarda ko`p muhokamalarga sabab bo`lgan mavzulardan biri bo`lganligi bois, tuman rahbariyati oldida sixni ham, kam kabobni ham kuydirmaydigan loyiha ishlab chiqish vazifasi turgan edi. Axir talab bor iqtisodiyot tarmoqlarini rivojlantirishdan barcha manfaatdor. Bu bilan aholi turmush sifati va qolversa, davlat xazinasi yaxshilanadi. Shunday davrda viloyatda birinchilardan bo`lib Namangan tumani 2-sektor hududi (prokuror sektori)da konteyner xizmat ko`rsatish shoxobchasi ish boshladi.
Konteyner nimasi bilan qulay va ahamiyatli?
Namangan tumani hokimi Sadritdin Mo`minov konteynerning afzalliklari haqida shunday deydi:
— Namanganda g`oyalar ko`p, er muammo. Huzurimizga ko`plab tadbirkorlar loyihalar bilan kelishadi, lekin ularga er ajratib berish haqida o`ylab qolaman. Kichik savdo va xizmat ko`rsatish shoxobchalari uchun esa koteyner loyihasi yaxshi yangilik bo`ldi. Do`kon yoki bironta shahobcha qurish uchun tadbirkor qancha hujjat tayyorlashiga to`g`ri keladi. Konteynerni esa istagan joyiga joylashtirsa bo`ladi. Muhimi ko`chaga, qatnovga halal bermasa bo`ldi. Hujjatlashtirishda ham muammo bo`lmaydi. Erdan vaqtinchalik tartibda foydalanish uchun qaror chiqarib beramiz. Shu bilan ishlayverishadi. Agar qachonki konteynerlar o`rnatilgan hudud biror rejaga tushsa, tadbirkor ob`ekti uchun “snos” muammosi bo`lmaydi. Konteynerini olib boshqa joyga ko`chirishi mumkin bo`ladi.
Tuman hokimining 1-o`rinbosari Azamjon Ahmadalievning keltirishicha, koteynerlarni tayyor shaklga keltirish harajati ham shoxobcha qurish harajatlariga nisbatan anchagina arzon. 1 ta konteynerni xizmat ko`rsatishga shay holga keltirish uchun 24-25 mln. so`m ketar ekan.
“Agar xabaringiz bo`lsa, tijorat banklari tomonidan tadbirkorlarga qurilish uchun kreditlar ajratilmaydi. Lekin konteyner qilaman deyishsa, bu uchun kreditlar ajratib beramiz. Kredit miqdori 6 oy imtiyozli davrdan so`ng 1,3 mln. so`m atrofida bo`ladi. Tadbirkor ijarada ham foydalangan ob`ekti uchun deyarli shuncha mablag` sarflaydi. Bu holda esa mulk o`ziniki bo`lib qolaveradi”, - deydi konteynerlarning tadbirkorlarga foydasini eslatib Azamjon Ahmadaliev.
Sektor hududida kambag`alikka qarshi qanday kurashilmoqda?
Tuman prokurori Habibulla Isoqovga qarashli 2-sektorda biz yuqorida keltirgan konteyner shoxobchalarini ishga tushirish natijasida hozircha 4 ta ish o`rni yaratilgan bo`lib, sektorga tegishli 13 ta MFYlar uchun ham shu turdagi konteynerlarga buyurtma berilgan. Ular tayyor bo`lishi bilan sektorda jami 42 ta ish o`rni yaratiladi.
Namangan tumanida “temir daftar”ni yuritishda unga kirgan aholini qizil, yashil va sariq toifalarga ajratish tajribasi ham aynan 2-sektor rahbari Habibulla Isoqovning tashabbusi hisoblanadi. 13 MFYdan umumiy hisobda 454taoila “temir daftar”ga kiritilgan bo`lsa, 01.07.2020 y.Xolatiga ko`ra 261 ta oila kambag`allikdan chiqarildi (yashil toifa), 183 ta chiqarish arafasida (sariq toifa), 10 ta oila sharoiti og`ir (qizil toifa). 540nafar ishsizlardan 510 nafari bandligi ta`minlandi, uyda tikuvchilik bilan band 151 ta xonadonga kooperasiya asosida ishni hajmli etkazib berish yo`lga qo`yildi, 9400 bosh parranda homiylik asosida tarqatildi, 30 ta xonadonga kooperasiya asosida bedana etkazib berilgan.
Sardorbek Rahmonqulov
