O`zbekiston Respublikasi Prezidenti Shavkat Mirziyoev raisligida 20 avgust kuni mutlaqo yangi tizim, tartib va yondashuvlar asosida iqtisodiy faollikni oshirish hamda har bir tuman va shaharga qo`shimcha zaxira yaratish chora-tadbirlari yuzasidan videoselektor yig`ilishi o`tkazildi.
Karantin talablari yumshatilgani tufayli mamlakatimizda iqtisodiy faollik osha boshladi. Savdo, ishlab chiqarish, xizmat ko`rsatish va boshqa sohalardagi tadbirkorlik faoliyati tiklanib, daromadlarni ko`paytirishga imkoniyat paydo bo`ldi.
Yig`ilishda tadbirkorlikni rivojlantirish bo`yicha shahar va tumanlardagi qo`shimcha imkoniyatlar tahlil qilinib, ularni ishga solish choralari belgilandi.
Joriy yil 1 dekabrga qadar 500 milliard so`m qo`shimcha zaxira shakllantirishga to`liq imkoniyat borligi aniq hisob-kitob qilingan. Ushbu mablag`lar ehtiyojmand aholini qo`llab-quvvatlash uchun respublika byudjetidan berilayotgan pullarga qo`shimcha resurs bo`ladi.
Avgust oyida 20 ming, sentyabrda 26 mingta korxona faoliyatini to`liq quvvatga olib chiqish, ularning pandemiya tufayli to`planib qolgan mahsulotlarini sotish uchun shart-sharoitlar yaratish zarurligi ta`kidlandi. Buning uchun yirik shaharlarda qo`shimcha savdo joylari tashkil etish, talab yuqori bo`lgan iste`mol mahsulotlarini to`liq elektron savdo tizimlariga joylashtirish vazifasi yuklatildi. Xomashyo olib kelish yoki eksportda qiynalayotgan korxonalarning transport-logistika masalalarini hal etish bo`yicha topshiriq berildi.
Viloyat hokimlari Biznes-ombudsman, Bojxona qo`mitasi bilan birga 1 oktyabrgacha tadbirkorlar tomonidan keltirilgan texnologik uskunani ishga tushirish hamda ular uchun er, bino, elektr, gaz va boshqa muhandislik-kommunikasiya masalalarini hal qilish zarurligi qayd etildi.
Hududlarda tadbirkorlikni yanada rivojlantirish bo`yicha zaxiralar ko`pligi ko`rsatib o`tildi. Misol uchun, davlat tomonidan ajratilgan subsidiya va kam foizli kredit evaziga Forish tumanida 100 ta quduq qazilib, oborotdan chiqib ketgan 2 ming 700 gektar erda 6 ta tokzor tashkil etildi. Buning natijasida 2,5 ming yangi ish o`rni yaratilib, byudjetga qo`shimcha tushum ta`minlanadi.
Shuningdek, Taxiatosh tumanida Issiqlik elektr stansiyasining tashlanma issiq suvidan foydalanib, 54 gektarda 7 ta gidroponika issiqxonasi barpo etilmoqda. Buning hisobiga joriy yilda 500 ta ish o`rni yaratiladi va qo`shimcha soliq manbai paydo bo`ladi.
Davlatimiz rahbari barcha hududlarda shunday imkoniyatlar borligini ta`kidlab, ularni oqilona ishga solish, kooperasiya orqali yangi korxonalarni qo`llab-quvvatlash zarurligini ta`kidladi.
Yana bir zaxira – erkin iqtisodiy zonalardagi muhandislik-kommunikasiya tarmoqlari bilan ta`minlangan 1 ming gektardan ziyod bo`sh er maydonlari. Ularda 17 ming ish o`rni yaratiladigan 120 ta loyihani amalga oshirish mumkin. Yig`ilishda ushbu loyihalarni puxta shakllantirib, tezroq ishga tushirish muhimligi qayd etildi.
“Yashirin iqtisodiyot”ni qisqartirish va shu orqali qo`shimcha zaxiralarni shakllantirish topshirig`i beriildi. Bunday qo`shimcha zaxiralar, shu jumladan, aholining ehtiyojmand qatlamini qo`llab-quvvatlash uchun muhim manba bo`ladi.
Qo`shimcha zaxirlarning sarflanishi ustidan jamoatchilik nazoratini o`rnatish va bu borada mahalliy kengashlar faoliyatini yanada kuchaytirish bo`yicha ko`rsatmalar berildi.
Yig`ilishda ishsiz yoshlar va xotin-qizlar bandligini ta`minlash masalasiga alohida ahamiyat qaratildi. Bosh vazir o`rinbosariga ularni talab yuqori bo`lgan kasblar va tadbirkorlikka o`qitish, shu asosda biznesini yo`lga qo`yishda moliyaviy qo`llab-quvvatlash tartibini joriy etish vazifasi yuklatildi. Bu ishlarni tizimli amalga oshirish maqsadida, mamlakatimizda joriy etilgan “temir daftar”lar singari, ishsiz yoshlar bo`yicha alohida (“Yoshlar daftari”), ishsiz va boquvchisiz xotin-qizlar bo`yicha alohida (“Ayollar daftari”) ro`yxatlar shakllantirib, har biri bilan yangi tizim, yangicha tartibda manzilli ishlash muhimligi ta`kidlandi.
Videoselektor yig`ilishida so`zga chiqqan hokimlar tadbirkorlikni rivojlantirish, qo`shimcha zaxiralarni shakllantirishga doir rejalari yuzasidan axborot berdi.
