Sarlavhamiz ko`pchilikni o`yga toldirib qo`yishi tayin. Hatto muallifni esidan og`ganga ham chiqaradiganlar topiladi. Lekin bu fakt! Maqolamizni o`qisangiz aynan shunday yurtdoshlarimiz ham borligiga amin bo`lasiz.
Xo`sh, bunga qanday erishiladi?
Kasb bilish insonni boy qiladi. Hunarli hech qaerda xor bo`lmaydi. Ammo ba`zi insonlar borki, taqdir taqozosi bilan yoki xohishsiz ravishda kasb-hunar o`rganishga intilmaydi. Natijada esa harakatsizlik yoki omadsizlik vajidanmi yordamga muhtoj aholi safiga qo`shilib qolishadi. To`g`ri, mamlakatimizda kam ta`minlanganlar ijtimoiy himoyasi ta`minotiga prezident va hukumat darajasida katta e`tibor qaratilyapti. Lekin tarqatilayotgan pullar sarflanadi, berilayotgan yordamlar esa iste`mol qilinadi. Ijtimoiy yordamlardan umidvor bo`lib qolsak, boqimandalik ko`payib ko`zlangan natijalarga erishib bo`lmaydi. Prezident Shavkat Mirziyoev tomonidan qabul qilinayotgan qaror va farmonlar bilan kambag`allik darajasini qisqartirish, ehtiyojmandlarni “temir daftar”ga kirgizish va ularni doimiy daromad manbaiga ega bo`lishida ko`maklashib, ro`yxatdan chiqarish bo`yicha mamlakatimizning barcha hududlari mutasaddilari o`z iqtisodiy va ijtimoiy imkoniyatlaridan kelib chiqib yondashishmoqda. Bu yondashuvlar qanchalik samarali? Faol hayot tarzida tanaffus yuzaga kelib, daromadsiz qolgan aholiga turli yo`llar bilan daromad topishlarida ruhiy motivasiyalar berish, hayotga, farovonlikka intilish uyg`otish, shu bilan birga daromad topishlariga ko`maklashish muhim sanaladi. Ularni hudud talabi va imkoniyatidan kelib chiqib kasbga yo`naltirish, qisqa muddatda o`qitish, daromad manbalari topishda ko`maklashish, imtiyozli kreditlar ajratish orqali bugun kambag`allikka qarshi kurashish choralari ko`rilmoqda. Bularni amalga oshirishda esa tadbirkorlik sub`ektlarining ahamiyati katta. Tadbirkorlar turli loyihalarni ishga tushirsa, ishchi o`rinlari yaratiladi. Tabiiyki, har bir rahbar o`z qo`l ostida malakali ishchilar ishlashini xohlaydi. Malaka esa vaqtlar o`tib shakllanadi. Biroq shunday tadbirkorlar borki, malakasiz ishsizga ham ish berib, ularni daromad qilishga qiziqtirib qo`yadi.
400 kishini ishli qilgan kichik qishloqning katta loyihasi
Navoiy viloyatining Qiziltepa tumaniga qilgan tashrifimiz davomida tumanda joylashgan “Toshrabot tekstil” MChJda bo`lib, u erda hatto tikuvchilikdan xabari yo`q bo`lgan ayollar ham ishlab daromad topayotganliklarining guvohi bo`ldik.
Gulmehra Xudoyberdieva, ishchi:
Men ushbu korxonada ip tozalovchi bo`lib ishlayman. Oldin hech qaerda ishlamaganman. Mahalla “temir daftar”ida ro`yxatda turganim uchun menga shu ishni tavsiya qilishdi. Tikuvchilik qo`limdan kelmaydi. Vazifam – korxonamizda ishlab chiqarilgan tayyor kiyim-kechak mahsulotlari choklarida ortiqcha chiqib qolgan iplaridan tozalash. Oylik maoshim 1 mln. 250 ming so`m. Bundan tashqari tushlik va avtobus ham korxona hisobidan. Birgina muammomiz daromad edi. Mana endi xursandmiz! Turmush o`rtog`im ham mavsumiy ish bilan ta`minlangan. 2 nafar farzandim bor. Turli yordam pullarini ham olib turibmiz.
Ahamiyatlisi, “Toshrabot tekstil” MChJ 2018 yilda ishga tushgan bo`lib, prezident Shavkat Mirziyoevning o`zi korxona qurilishi tamal toshini qo`ygan. Kichik qishloqda tashkil etilgan 400 ishchi o`rniga ega katta korxonada yaqin hududlardan keluvchi xotin-qizlar mehnat qilayotgan bo`lib, shundan 138 tasi “temir daftar”ga kiritilgan oilalar a`zolaridir.
Ulug`bek To`raqulov, “Toshrabot tekstil” MChJ bosh direktori:
Korxonamizda mahsulotlar 100 foizli paxta xom-ashyolaridan ishlab chiqariladi. Asosan 14 yoshgacha bo`lgan bolalar kiyim-kechaklari bo`lgan mahsulotlarimizning 90 foizi Rossiya va Italiya davlatlariga eksport qilinadi. Yillik eksport miqdori 3 mln. AQSh dollarini tashkil qiladi. Ishchilarmiz toifalariga qarab 1 mln. 250 ming so`mdan 3 milliongacha oylik maoshi, tushlik va avtobuslar bilan ta`minlanadi. Toifalari oshgani sayin oylik ham shunga yarasha ko`tarilib boradi.
Bugun aholiga davlatning munosabati o`zgargan. Ilgarilari hatto tuman hokimini ham tanimasdik. Hozir esa u xoh hokim bo`lsin, prokuror yoki ichki ishlar boshlig`i o`zlari uyma-uy yurib, aholi holidan xabar olyapti. Ularni har taraflama qo`llab-quvvatlash uchun imkon qadar harakat qilishyapti.
Qiziltepaga qaytsak, 400 o`rinli ishning tashkil qilinishi kichik hudud uchun yaxshi ko`rsatkich. Ayniqsa, tadbirkor korxona faoliyatini yana ham kengaytiraman deb tursa. Muhimi, korxona uchun doimiy buyurma bor. 400 ta oilaning qozoni qaynab turadi...
Sardorbek Rahmonqulov
