Ijtimoiy tarmoqlarda va internet nashrlarida xorijga ishga ketish istagidagi bir guruh fuqarolarning “International job organization xususiy bandlik agentligi” xususiy bandlik agentligi tomonidan aldangani va tashkilot rahbarlariga nisbatan jinoiy ish qo`zg`atilgani haqida xabarlar tarqaldi.
Tashqi mehnat migrasiyasi agentligining bayonotida, mazkur xususiy bandlik agentiligiga O`zbekiston Respublikasidan tashqarida ish izlayotgan shaxslarni ishga joylashtirish uchun 2019 yil 18 aprel kuni Bandlik va mehnat munosabatlari vazirligi tomonidan №0058 raqamli lisenziya berilgan. Biroq u o`z faoliyati davomida birorta O`zbekiston Respublikasi fuqarosini qonuniy mehnat qilish uchun xorijga jo`natmagan.
Tashqi mehnat migrasiyasi agentligiga fuqarolar tomonidan norozilik mazmunidagi ko`plab murojaatlar kelib tushgani sababli ushbu holat Bandlik va mehnat munosabatlari vazirligiga ma`lum qilingan hamda lisenziyasi 2020 yil 24 aprel kuni 10 kunga to`xtatilgan. Mazkur qarorda xususiy bandlik agentligi rahbariyatiga 6 may kunigacha muammolarni hal qilish bo`yicha topshiriqlar berilgan.
Biroq, qayd etilgan muammolar bartaraf etilmaganligi sababli joriy yil 7 may kuni “International job organization” xususiy bandlik agentligi lisenziyasi Vazirlikning tegishli qarori asosida bekor qilingan.
Agentlik uu o`rinda fuqarolardan xorijda ishlash bo`yicha shartnomalar tuzayotganda xizmat ko`rsatuvchi va ish beruvchi tashkilotlarning imkoniyatlari, mehnat sharoitlari, ish haqi miqdori kabi masalalarni atroflicha o`rganishlarni tavsiya qilmoqda.
Muammoli vaziyatlarda Tashqi mehnat migrasiyasi agentligiga 71 202-33-55 telefon raqami orqali murojaat qilish so`ralmoqda.
