Ijtimoiy tarmoqlarda Toshkentda IIB xodimi ko`chada rangli sharlar sotayotgan fuqaroning sharlarini majburan uchirib yuborgani aks etgan video tarqaldi.
Toshkent shahar IIBB ushbu holatga aniqlik kiritdi.
“Xavfsizlik me`yorlarini buzgan holda gaz bilan to`ldirilgan havo sharlarining portlashi oqibatida yosh bola og`ir jarohatlar bilan shifoxonaga etkazildi” – agarda ishlatilishi og`ir oqibatlarga olib kelishi mumkin bo`lgan mahsulotlarning savdosi IIO xodimlari tomonidan to`xtatilmaganida, yuqoridagi kabi xabarlarni internet tarmog`ida tez-tez uchratib turgan bo`lardingiz.
Internet tarmog`ida ichki ishlar organlari xodimlari ko`chadagi savdogarlardan havo sharlarini tortib olishayotgani tushirilgan video tarqaldi. Video ostida mualliflar IIBB xodimlarini savdogarlarning pul ishlash niyatini tushunmaslikda ayblab, o`zlari mazkur sohada keng tarqalgan qoidabuzarliklarni, xavf va oqibatlarini tushunmasliklarini namoyish etdilar.
Mazkur video Shayxontohur tumanida olingan. Toshkent shahar IIBB xodimlari savdogarlardan havo sharlarini olib, ularni uchirib yuborishlarining sababi – mazkur sharlar yonuvchi gaz bilan to`ldirilganidadir. Agarda bu kabi shar xonada yoki boshqa yopiq maydonda portlab ketsa, uning yaqinidagi odamlarga jiddiy kuyish va boshqa jarohatlar etishi mumkin.
Jahon amaliyotida havo sharlarini geliy bilan to`ldirish tavsiya etiladi – bu inert, zaharli bo`lmagan, yonmaydigan va nisbatan xavfsiz gaz turi hisoblanadi. Ammo u arzon emas, shu sababli bir qator sotuvchilar tejash maqsadida sharlarni metan yoki vodorod bilan to`ldirib, sharlarni ma`lum vaqtga kelib portlaydigan bombaga aylantirishadi. Portlashga sabab bo`luvchi omillar ko`p – tort ustida yonib turgan sham, sigaret, maishiy texnikadan chiqishi mumkin bo`lgan uchqun... Shu vaqtda shar oldida qancha ko`p odam va sharlar bo`lsa – oqibati ham shunchalik ayanchli bo`lishi mumkin.
Ilgari biz havo sharlari portlashi oqibatida yuz bergan mudhish hodisalar haqida xabar bergan edik. Ular bilan quyidagi havolalar orqali tanishib chiqishingiz mumkin:
https://iibb.uz/uz/news/enuvchan-gaz-bilan-tldirilgan-avo-sharlari-bjicha-shimcha-malumot,
https://iibb.uz/uz/news/gaz-bilan-tldirilgan-gazlardan-etiet-bling,
https://iibb.uz/uz/news/havfli-sharlar.
Hurmatli hamshaharlar va Toshkent mehmonlari! Sizdan havo shari olishda va undan foydalanishda juda ehtiyot bo`lishingizni so`raymiz. Geliy bilan to`ldirilgan shar xarid qilayotganingizga ishonch hosil qiling, xavfsizlik texnikasi bilan tanishib chiqing (ayniqsa bolalar uchun uyushtirilgan bayramlarda). Unutmang, boshqa “engil” gaz oson yonib, yong`in va jarohatlarga sabab bo`lishi mumkin. Shuningdek eslatib o`tamiz: havo sharlari yaqinida, ayniqsa yopiq joyda bo`lganingizda (shu o`rinda avtomobilda ham) sigaret chekmang", - deyiladi rasmiy munosabatda.
