Avval xabar berilganidek, bugun, 29 sentyabr kuni O`zbekiston Respublikasi Bosh vaziri Abdulla Aripov Savdo-iqtisodiy hamkorlik bo`yicha Hukumatlararo komissiyaning 7-yig`ilishida ishtirok etish uchun 29 sentyabr kuni Tojikistonga bordi.
Dushanbe shahrida O`zbekiston Respublikasi Bosh vaziri Abdulla Aripov Tojikiston Respublikasi Bosh vaziri Qohir Rasulzoda bilan uchrashdi.
Dastlab hukumat rahbarlari tor doirada uchrashuv o`tkazdi, deya yozdi O`zA.
O`zbekiston Bosh vaziri tojikistonlik hamkasbiga iliq va samimiy qabul uchun minnatdorlik bildirib, ushbu uchrashuv hamkorlikning bugungi holati va istiqbollarini muhokama qilish uchun qulay imkoniyat ekanini qayd etdi.
Tojikiston Bosh vaziri davlatlarimiz o`rtasida qisqa muddatda mustahkam hamkorlik qaror topgani, bu tashrif izchil mustahkamlanib borayotgan o`zaro manfaatli va faol muloqotning mantiqiy davomi ekanini alohida ta`kidladi.
Shundan so`ng ikki mamlakat hukumatlari vakillari ishtirokida kengaytirilgan tarkibda muzokaralar davom ettirildi.
Davlatlarimiz Rahbarlarining siyosiy irodasi va uzoqni ko`zlab yuritayotgan oqilona siyosati tufayli mamlakatlarimiz tarixida yangi zarhal sahifa ochilgani, O`zbekiston – Tojikiston munosabatlari qayta tiklangani, qisqa muddatda mustahkam hamkorlik qaror topgani, ko`p qirrali aloqalar yangi bosqichga ko`tarilib xalqlarimiz do`stligi yanada mustahkamlangani qayd etildi.
Savdo-iqtisodiy hamkorlik bo`yicha Hukumatlararo komissiyaning majlisida Oliy darajadagi uchrashuvlar hamda hukumat rahbarlari raisligida 2019 yil aprel oyida Termiz shahrida o`tgan Savdo-iqtisodiy hamkorlik bo`yicha Hukumatlararo komissiyaning 6-yig`ilishida erishilgan kelishuvlarning ijrosi holati ko`rib chiqildi.
Qayd etilganidek, o`zaro savdo hajmi o`sib bormoqda. Jumladan, so`nggi uch yilda mazkur ko`rsatkich 2,4 barobardan oshdi. Pandemiyaga qaramay o`zaro tovar aylanma o`tgan yilning mos davriga nisbatan 4,3 foizga ortib, 317 million dollarni tashkil etdi.
– O`zaro savdo aylanmasi mamlakatlarimiz salohiyatiga mos emas, – dedi A.Aripov. – Shu bois, Davlatlarimiz rahbarlari tomonidan oldimizga yaqin yillarda o`zaro tovar ayirboshlash hajmini 1 milliard dollargacha etkazish vazifasi qo`yilgan. Buning uchun barcha imkoniyatlarga egamiz. Chunki, foydalanilmagan ulkan zaxiralar mavjud.
Majlisda shuningdek, savdo-iqtisodiy, transport-kommunikasiya, energetika, madaniy-gumanitar hamda qishloq va suv xo`jaligi sohalaridagi hamkorlikning bugungi holati va istiqbollari muhokama qilindi.
Uchrashuv yakunlari bo`yicha Savdo-iqtisodiy hamkorlik bo`yicha Hukumatlararo komissiyaning 7-yig`ilishi bayoni imzolandi.
