Germaniyada chop etiladigan ommabop «Berliner Telegraph» jurnalining dekabr oyidagi sonida O`zbekistonning zamonaviy taraqqiyotiga bag`ishlangan tahliliy maqola e`lon qilindi.
Muallif, taniqli nemis siyosatshunosi Mattias Dornfeld «O`zbekistonning yangi imiji: ochiqlik va hamkorlikka tayyorlik» sarlavhali materialda mamlakatimizda amalga oshirilayotgan keng ko`lamli demokratik o`zgarishlar, respublika rahbariyatining tashqi va mintaqaviy siyosati haqida batafsil so`z yuritgan.
Maqolada O`zbekiston Evroosiyoning markazi va Markaziy Osiyodagi eng ko`p aholi yashaydigan davlat sifatida mintaqaviy hamkorlikda etakchi mavqega ega ekani ta`kidlangan.
«Markaziy Osiyodagi eng ko`p aholi istiqomat qiladigan davlat rahbariyati mintaqaviy hamkorlikda etakchi rolni o`z zimmasiga olish kerakligini angladi. Qo`shni Qirg`iziston va Tojikiston bilan mintaqaviy daryolarning quyi qismida joylashgan mamlakatlar, jumladan O`zbekistonga suv etkazib berish masalasidagi ziddiyatlar hal qilindi. Ikki tomonlama chegaradan o`tish punktlari ochilib, quruqlik va havo orqali transport aloqalari tiklandi. O`zbekiston mintaqada umumiy iqtisodiy rivojlanish, xavfsizlik va barqarorlikka intilmoqda», - deya ta`kidlaydi siyosatshunos.
Muallif, shuningdek, O`zbekistonning Afg`onistonda tinchlik o`rnatish, qo`shni mamlakatni iqtisodiy qayta tiklash borasidagi sa`y-harakatlariga alohida e`tibor qaratgan.
«2016 yilgi Prezident saylovidan so`ng O`zbekistonning Afg`onistonga nisbatan siyosati yangi turtki oldi. U yaxlit yondashuvga asoslangani bilan ahamiyatli. Prezident Shavkat Mirziyoev Afg`oniston xavfsizligi uning davlati xavfsizlik masalasi hamdir va Afg`onistondagi tinchlik jarayoni mintaqaviy va global kun tartibida yanada muhim ahamiyat kasb etishi kerak, deb hisoblaydi», - deya qayd etgan nemis siyosatshunosi.
Shu nuqtai nazardan, O`zbekiston Afg`onistonga iqtisodiy ko`mak ko`rsatayotgani ma`lum qilinadi. Jumladan, mamlakat qo`shni davlatni elektr energiyasi bilan ta`minlamoqda, Termiz va Afg`oniston shimolidagi Mozori Sharif o`rtasidagi temir yo`l aloqasini kengaytirishda ishtirok etmoqda, yangi temir yo`l tarmoqlari qurilishini to`la qo`llab-quvvatlamoqda.
Nashr O`zbekiston rahbarining ko`plab tashabbuslari Germaniyaning Evropa Ittifoqi Kengashiga raisligi davrida qabul qilingan EI Markaziy Osiyo strategiyasining maqsad va vazifalariga mos kelishini qayd etgan. Prezident Shavkat Mirziyoevning iqtisodiy islohotlari boshlangandan buyon Evropa Ittifoqiga a`zo davlatlar, shu jumladan Germaniya O`zbekistonning muhim sheriklari ekani ta`kidlangan. Shu nuqtai nazardan, 2019 yil yanvar oyida O`zbekiston rahbarining GFRga muvaffaqiyatli tashrifi, shuningdek, Germaniya Federal Prezidenti Frank-Valter Shtaynmayerning o`sha yil may oyida O`zbekistonga javob tashrifi samarali bo`lgani eslanadi.
«Prezident va uning hukumatining o`zbek jamiyati manfaatlari yo`lidagi istiqbolli islohotlari Germaniya tuzilmalari tomonidan qat`iy qo`llab-quvvatlanmoqda», - deyiladi materialda.
Maqolada Prezident Shavkat Mirziyoev tomonidan BMT Bosh assambleyasining 75-sessiyasida ilgari surilgan yangi xalqaro tashabbuslarning mazmun-mohiyati va ahamiyati ochib berilgan. Shuningdek, respublikaning BMT Inson huquqlari bo`yicha kengashiga saylangani alohida qayd etilgan.
«Shavkat Mirziyoev to`rt yil avval Prezident etib saylanganidan buyon O`zbekistonning tashqi va mintaqaviy siyosati sezilarli darajada o`zgardi. Muhim islohotlar boshlandi, mamlakat ochildi va xalqaro tashkilotlar doirasida muntazam ravishda muhim tashabbuslar va siyosiy takliflarni ilgari surmoqda», - deb xulosa qiladi Mattias Dornfeld.
Muallif G`arbda Prezident Shavkat Mirziyoev MDH makonidagi qat`iy islohotchi sifatida qabul qilinadi va, ayniqsa, iqtisodiy aloqalarni kengaytirish haqida gap ketganda, kutilgan mehmon sifatida e`tirof etiladi, deb ta`kidlagan.
