Surxondaryo viloyati hokimligi rasmiy sayti xakerlar hujumiga uchradi. Bu haqda rasmiy saytga kirishda yozib qoldirilgan murojaat o`z tasdig`ini bermoqda.
Murojaat viloyat hokimi To`ra Bobolovga yo`llangan bo`lib unda:
"Surxondaryo viloyati hokimi Bobolov To`ra Abdievichga biz quyidagilarni ma`lum qilamiz: AKT bo`limiga universitetni otasining puliga tugatgan "kattakon"larning bolasini emas, soha bo`yicha haqiqiy mutaxassislarni ishga oling. Biz butun hokimiyat tizimiga kirib bordik agar yaxshi mutaxassislarni e`tiborga olib, ularga qimmatli vaqtingizni ajratmasangiz, butun internetda sizning yopiq qaror va farmoyishlaringiz sharmandalarcha tarqaladi. Biz butun hokimiyat tizimiga kirib ulgurdik. Siz bizdan emas, avvalo, yaratgandan qo`rqing, agar xodimlarni ishga olish tartibini o`zgartirmasangiz, biz sizga guruhimiz nomidan va`da beramiz: butun boshli tizimni ishdan chiqaramiz. AKT sohasiga e`tibor qaratishga majbursiz! Hammasi yaxshi bo`ladi yaratgandan qo`rqing va vijdoningizga quloq tuting! Yana ko`rishguncha!"- deya yozib qoldirilgan.
Ayni paytda holat yuzasidan hokimlikning ijtimoiy tarmoqlardagi rasmiy sahifalarida biror munosabat bildirilmadi.
