“Toshkent xalqaro kinofestivali”ni qayta tiklash va uni har yili muntazam o`tkazish” mavzusida anjuman tashkil etildi. Bu haqda "O`zbekkino" Milliy agentligi Axborot xizmati ma`lum qilmoqda.
Unda yurtimiz va xorijdan bir qancha kinomutaxassislar ishtirok etishdi. “Toshkent xalqaro kinofestivali”ni tiklash jarayoni, kutilayotgan maqsadli rejalar, yangi loyihalar bo`yicha muhokamalar o`rtaga tashlandi.
Anjumanda xorijlik mutaxassislar Joel Shapron, Benoi Ginisti, Birgit Boymers, Svetlana Slapke, Nizam Shaxin, Suda Apushi, Maxbuba Saidaxmedova, Roman Krasniskiy va boshqalar onlayn ravishda videomurojaat yo`lladilar.
Unda festivalning dasturini tuzish, o`tkazish sanalari, ijodiy kunlarini belgilash, shuningdek, badiiy jihatdan puxta va qiziqarli filmlarni taqdirlash, festival doirasida anjumanlar o`tkazish kabi masalalar ko`rib chiqildi. Xalqaro ekspertlar tomonidan mazkur festivalni o`tkazish bo`yicha tajriba almashish, amaliy jarayonlarni yuqori saviyada tashkil etish bo`yicha tavsiyalar berildi. Eng asosiysi, mazkur festivalni Mustaqilligimizning 30 yillik bayrami arafasida o`tkazish taklifi berildi.
Eslatib o`tamiz, “Toshkent xalqaro kinofestivali”ni qayta tiklash yuzasidan muhtaram yurtboshimiz 2020 yil Parlamentga murojaatnomasida alohida ta`kidlab o`tgan edi.
