Ijtimoiy tarmoqlarda oshqozon faoliyati buzilganda qabul qilinadigan «Enterofuril» dori vositasi kapsulasidan mix chiqqanligi tasvirga olingan video tarqaldi.
Farmasevtika tarmog`ini rivojlantirish agentligi Matbuot xizmatining ma`lum qilishicha, aslida videoda aytilayotgan voqea bizda emas balki Qozog`istonda tasvirga olingan va haqiqatga mutlaqo to`g`ri kelmaydi.
Bayonotda Qozog`iston Respublikasi Sog`liqni saqlash vazirli Tibbiyot va farmasevtika nazorati qo`mitasi tomonidan Qo`mitaga iste`molchilar, mazkur dori vositasini ro`yxatdan o`tkazgan kompaniya, shuningdek farmasevtika faoliyati sub`ektlari va tibbiyot xodimlaridan “Enterofuril®” dori vositasi kapsulasida biror yot narsalar mavjudligi to`g`risida ma`lumot (yoki shikoyat) kelib tushmaganligi aytilgan.
Bosniya va Gersegovinaning “Bosnalek” AJ tomonidan ishlab chiqarilgan kapsula shaklidagi “Enterofuril ®” dori vositasi Qozog`iston Respublikasida ro`yxatdan o`tkazilgan va tibbiy maqsadlarda foydalanish uchun ruxsat etilgan (ro`yxat raqami RK-PS-5N022825 - 03.02.2017 y., RKLS-5N9022904 - 10.04. 2017 y).
Shu o`rinda, Farmasevtika tarmog`ini rivojlantirish agentligi Matbuot xizmati yolg`on videoni tarqatayotgan telegram kanallari ma`murlariga quyidagilarni eslatdi:
➖ Ijtimoiy tarmoqlar orqali ishlab chiqaruvchi yoki raqobatchini obro`sizlantirish yoxud iqtisodiy zarba berish maqsadida asoslanmagan, yolg`on ovozli, foto va videoxabarlarni tarqatgatlik uchun Jinoyat kodeksining 192-moddasida javobgarlik belgilanganligini;
➖ jamoat tartibiga yoki xavfsizligiga tahdid soluvchi yolg`on axborotni tarqatish, shu jumladan, OAV, telekommunikasiya tarmoqlari yoki Internet jahon axborot tarmog`ida tarqatganlik uchun Ma`muriy javobgarlik to`g`risidagi kodeksning 202²-moddasida javobgarlik belgilanganligini;
➖ “Axborotlashtirish to`g`risida”gi Qonunning 12¹-moddasi 2-qismiga muvofiq, veb-saytning va (yoki) veb-sayt sahifasining egasi, shu jumladan bloger hamma erkin foydalanishi mumkin bo`lgan axborot joylashtiriladigan Internet jahon axborot tarmog`idagi o`z veb-saytiga va (yoki) veb-sayt sahifasiga hamma erkin foydalanishi mumkin bo`lgan axborotni joylashtirishdan avval uning to`g`riligini tekshirishi, shuningdek, joylashtirilgan axborotning noto`g`riligi aniqlangan taqdirda uni darhol o`chirib tashlashi shart, -- deyiladi ma`lumotda.
