"Darakchi" tahririyatiga Buxoro shahrida yashovchi fuqaro R.Kamolovadan murojaat kelib tushdi:
— Hujjatga ko`ra, ish vaqtimiz 8:00 dan 17:00 gacha. Biroq kechki soat 21:00 gacha ishlatishadi. Ammo buning uchun qo`shimcha haq to`lanmaydi. Mehnat shartnomasidagi huquqlarim buzilayotgani yuzasidan qanday qonuniy harakat qila olaman?
Fuqaroning murojaatiga javob olish maqsadida Fuqarolik ishlari bo`yicha Mirzo Ulug`bek tumanlararo sudi raisi o`rinbosari Ahror SULAYMONOV bilan bog`landik...
— Qonunga asosan, 6 kunlik ish haftasida har kungi ishning muddati 7 soatdan, 5 kunlik ish haftasida esa 8 soatdan ortib ketmasligi lozim. Ish vaqtidan tashqari ishlar xodimning roziligi bilan qo`llanishi mumkin.
Demak, ushbu vaziyatda, agar sizning roziligingiz olinmay, ish vaqtidan tashqari ishlar qo`llanilayotgan bo`lsa, haqiqatdan ham mehnat huquqlaringiz buzilayotgan hisoblanadi. Bunday holatda mehnat huquqlaringizni himoya qilishni so`rab, mehnat to`g`risidagi qonun hujjatlariga rioya qilinishini tekshiruvchi va nazorat qiluvchi organlar (shahar Bandlik bosh boshqarmasi Davlat mehnat huquq inspeksiyasi, shahar prokuraturasi)ga, shuningdek, FIB sudga murojaat qilish huquqingiz mavjud.
