Senat raisining birinchi o`rinbosari Sodiq Safoev Gazeta.uz muxbiriga 2021 yilgi prezident saylovlari oldingi yillarda o`tkazilgan islohotlarga baho beruvchi referendum bo`lishini aytgan.
U davlat rahbari lavozimiga Shavkat Mirziyoevdan boshqa loyiq nomzodni ko`rmayotganligini ta`kidlagan.
«Bu inson islohotlarni boshladi, ularning lokomotivi, g`oyalar generatori. Menimcha, unga keyingi muddatga yangi mandat berish O`zbekiston kelajagi uchun hayotiy ahamiyatga ega», — deya ta`kidlagan.
O`z o`rnida, senator alternativ dastur va nomzodlarsiz «saylovlar to`laqonli, adolatli va haqqoniy deb baholanmasligini» bildirgan.
Sodiq Safoev saylovlarda mustaqil nomzod sifatida qatnashish imkoniyati yo`qligiga ham to`xtalgan.
