Prezident Shavkat Mirziyoev 6 mart kuni Urush va mehnat faxriylari pansionatini borib ko`rdi. Yotoqxona va davolash xonalarida yaratilgan sharoitlarni ko`zdan kechirdi.
Davlatimiz rahbari muassasada yashayotgan faxriylar bilan suhbatlashdi.
- Bu erga kelib, Vatanimiz uchun ko`p mehnat qilgan sizdek mo``tabar insonlar bilan uchrashib turganimdan juda xursandman. Fursatdan foydalanib, bu erdagi aziz onaxonlarimizni, shifokor ayollarimizni yaqinlashib kelayotgan 8 mart bayrami bilan tabriklayman, - dedi Shavkat Mirziyoev.
Nuroniylar davlatimiz rahbariga tashrifi, keksa avlodga e`tibori uchun minnatdorlik bildirdi.
Urush va mehnat faxriylari pansionatida 138 nuroniy davlat ta`minotiga olingan. Prezidentimiz bu erda madaniy tadbirlar o`tkazish uchun yangi bino hamda pansionatga tutash 3 gektar maydonda Nuroniylar parkini barpo etish bo`yicha mutasaddilarga ko`rsatma berdi.
Videokonferensiya tarzida o`tgan uchrashuvda Qoraqalpog`iston Respublikasi va viloyatlar, ijtimoiy muassasalar rahbarlari ham ishtirok etdi. Mamlakatimizdagi «Saxovat» va «Muruvvat» uylaridagi sharoitlarni, tibbiy-ijtimoiy xizmatlarni yaxshilash masalalari muhokama qilindi.
- Bugun boshqacha uchrashuv bo`ladi. Faqat bu pansionat emas, mamlakatimizdagi barcha 34 ta «Saxovat» va «Muruvvat» uyini yaxshilash choralarini kelishib olamiz. Ularda jami 9 ming 700 o`rin mavjud bo`lib, hozirda 8 ming 840 nafar nuroniylarimiz yashab, davolanyapti. Lekin bu uylarga hech kim kirmagan, faqat bayramlardagina eslangan, tartib, e`tibor bo`lmagan. Bunday insonlar mehr izlaydi, e`tibor izlaydi. Ularning duosini olsak, yurtimizga baraka yog`iladi, - dedi Prezident.
«Saxovat» va «Muruvvat» uylaridagi tibbiy uskuna va jihozlarni yangilash, zamonaviy fizioterapiya bo`limlari tashkil qilish bo`yicha topshiriq berildi. Barcha muassasalarga avtobus sovg`a qilib, yurtimizning diqqatga sazovor joylari va ziyoratgohlarga sayohatlarini uyushtirish, konsert dasturlari, havaskorlik to`garaklari tashkil etish zarurligi ta`kidlandi.
Sog`liqni saqlash vazirligiga barcha “Saxovat” va “Muruvvat” muassasalaridagi sharoitlarni yaxshilash, oziq-ovqat va dori-darmon ta`minoti me`yorlarini qayta ko`rib chiqish vazifasi qo`yildi.
