So`nggi kunlarida ijtimoiy tarmoqlarda O`zbekiston xalq hofizi Sherali Jo`raevning sog`ligi yomonlashgani bilan bog`liq turli xabarlar tarqaldi. Qator ijodkor, jurnalist va Jo`raevlar xonadoniga yaqin bo`lgan insonlar ushbu xabarlar asossizligini aytib, xofizni ayni paytda Turkiyada ta`lim olayotgan qizining oldiga ketgani haqida ma`lum qilishdi.
"Facebook" ijtimoiy tarmog`ida Sohibjon Alijonov O`zbekiston xalq shoiri Iqbol Mirzoning O`zbekiston xalq xofizi Sherali Jo`raev haqqiga duo qilib yozgan she`ri bilan bo`lishdi.
ShERALI HOFIZ HAQQIGA
Dilingizga Haq mug`anniy so`z solsin,
Kaftingizga farishtalar ko`z solsin,
Dadam uni Sheralijon der edi,
Duo qiling, Sheralijon tuzalsin.
U kuylasa, qo`yilardi qoshiqlar,
Unga oshno oshiqlaru ma`shuqlar,
Milliy g`oya bo`lgan teran qo`shiqlar,
Duo qiling, Sheralijon tuzalsin.
O`zbegim, deb na`ra tortgan chog`lari
Ariganday bo`ldi elning dog`lari,
Esga tushdi do`ppi-yu belbog`lari,
Duo qiling, Sheralijon tuzalsin.
Kimlarga tog`, kimlargadir qir umr,
Kimlarga jo`n, kimlargadir sir umr,
Qishin-yozin xizmat qildi bir umr,
Duo qiling, Sheralijon tuzalsin.
Rahmat, sizga, boshidan pul sochganlar,
Yaxshi kunda katta quchoq ochganlar,
Yomon kunda to`yda ko`rsa qochganlar,
Duo qiling, Sheralijon tuzalsin.
Hayot ekan, ko`rdik allakimlarni,
Kim zo`r bo`lsa, ta`qiq toshin ilardi.
O`zi pinhon Sheralini tinglardi,
Duo qiling, Sheralijon tuzalsin.
Navoiyni elga yoygan ustoz u,
Bobur Mirzo ilkidagi shahboz u,
Allaqachon klassik u, mumtoz u,
Duo qiling, Sheralijon tuzalsin.
Kambag`alning darmonidir navosi,
Qo`lin olmoq ulusning muddaosi,
Jigarimiz, oilamiz a`zosi...
Duo qiling, Sheralijon tuzalsin.
Qo`shig`ini aytib shuhrat topganlar,
Shuhrat kirgach, eshigini yopganlar,
To`ralarning davrasiga chopganlar,
Duo qiling, Sheralijon tuzalsin.
Xalq so`rasa, Xalloq bermay qo`ymaydi,
Bir tan bo`lib birlashmasak bo`lmaydi,
Xalq birlashsa, chin Hofizi o`lmaydi,
Duo qiling, Sheralijon tuzalsin.
Hofiz ulkim, Haq mushafin yod etgan,
Muslim ulkim, kufriyatni yot etgan,
Inson ulkim, millatim deb dod etgan,
Duo qiling, Sheralijon tuzalsin.
She`r yozmadim, duo yozdim subhidam,
Sherakadek kuldi ro`yi tal`at ham.
U sog`ayar, sog`ayadi san`at ham,
Duo qiling, Sheralijon tuzalsin.
IQBOL MIRZO