2020 yil 17 mart kuni Toshkent viloyatining Quyi Chirchiq tumani IIBga «Birlik» MFY hududidan o`tuvchi To`ytepa-Oqqurg`on-Yangiyo`l avtomagistral yo`li chetidagi dala maydonida yoshi taxminan 60larda bo`lgan noma`lum erkak kishining murdasi yotgani haqida xabar kelib tushadi. Shundan so`ng tezkor tergov guruhi tuzilib, O`zbekiston Respublikasi Jinoyat kodeksining 97-moddasi 1-qismi bilan jinoyat ishi qo`zg`atilgan. Bu haqda "Xalq so`zi" «O`zbekiston» telekanaliga tayanib xabar berdi.
Sud tibbiy-ekspertiza xulosasiga ko`ra, marhumning tanasida 42ta jarohat izi topilgan va u ko`p qon yo`qotish natijasida vafot etgan.
Shu kunning o`zida Toshkent viloyat prokuraturasi xodimlari murdaning shaxsini aniqlagan. Marhum o`zining «Matiz» avtomashinasida kirakashlik qiluvchi, 1960 yilda Oqqo`rg`on tumanida tug`ilgan Davlatboy Xoliqulov bo`lib chiqqan.
«Dastlabki tergov harakatlari davomida 1999 yilda tug`ilgan Javohir Mirahmedov o`zining jinoiy sherigi Sardor Hikmatillaev bilan fuqarolarni avtomashinasini talonchilik, bosqinchilik yo`li bilan egallab, qismlarga bo`lib mashina ehtiyot qismlarini sotish orqali boylik orttirishni o`ziga maqsad qilib olgan», deydi Bosh prokuratura boshqarma boshlig`i Azimjon Yo`ldoshev.
Jinoyat tafsilotlariga ko`ra, 1999 yili Chinoz tumanida tug`ilgan Javohir Mirahmedov 2016 yilning 16 mart kunidan 17 mart kuniga o`tar kechasi Toshkent-Do`stobod avtomagistral yo`liga chiqib Davlatboy Xoliqulov boshqaruvidagi «Matiz» rusumli avtomashinani to`xtatib yo`lovchi sifatida o`tiradi va Yangiyo`l tumanigacha borishini aytadi. Avtomashinada bo`lgan qolgan yo`lovchilar tushib qolgach J.Mirahmedov o`zida olib yurgan pichog`i bilan haydovchiga hujum qiladi. U marhumga jami 42 marotaba kesuvchi-sanchuvchi jarohat etkazgan va avtomashinani sherigi Sardor Hikmatillaevni uyiga olib borib bergan.
S.Hikmatillaev mashinani ehtiyot qismlarga ajratish uchun qarindoshi Majid Umarovni yordamga chaqiradi va dalillar yo`q qilinadi.
«Ayblanuvchilar Javohir Mirahmedov, Sardor Hikmatillaev, Majid Umarovlarga O`zbekiston Respublikasi Jinoyat kodeksi 97-moddasi 2-qismining tegishli bandlari hamda Jinoyat kodeksining boshqa moddalari bilan ayb e`lon qilinib, ayblari dastlabki tergov jarayonlarida o`z tasdig`ini topdi va sudga yuborildi», deydi Toshkent viloyat prokuraturasi bo`lim boshlig`i Abdurahmon Hojiev.
Jinoyatchilar mashinaning ayrim ehtiyot qismlarini Sergeli mashina bozoriga olib chiqib sotib yuborgan.
Jinoyat ishlari bo`yicha Toshkent viloyat sudining 2020 yil 7 sentyabrdagi hukmiga ko`ra, Javohir Mirahmedov 18 yil, Sardor Hikmatillaev 11 yil muddatga ozodlikdan mahrum qilindi, Majid Umarovga esa 4 yil-u 6 oyga ozodlikdan cheklash jazosi tayinlangan.
