Oliy Majlisi Senatining o`n uchinchi yalpi majlisida xalq deputatlari mahalliy Kengashlarining ayrim qarorlari bekor qilindi

O`zbekiston Respublikasi Oliy Majlisi Senatining o`n uchinchi yalpi majlisi kun tartibidagi navbatdagi masala – xalq deputatlari mahalliy Kengashlarining ayrim qarorlarini bekor qilish to`g`risidagi masala ko`rib chiqildi. 

Ma`lumki, yaqinda amaldagi qonun hujjatlariga kiritilgan yangiliklarga muvofiq, Senatga mahalliy Kengashlarning Konstitusiya va qonunlariga, Prezident farmonlari, qarorlari va farmoyishlariga zid keladigan qarorlarini bekor qilish vakolati berildi.

O`z o`rnida Biznes ombudsman, Inson huquqlari bo`yicha milliy markaz va Monopoliyaga qarshi kurashish qo`mitasi tomonidan xalq deputatlari Surxondaryo viloyati hamda G`uzor, Mirishkor, Qarshi tumanlari va Qarshi shahar Kengashlarining ayrim qarorlarini bekor qilish bo`yicha murojaatlar kelib tushdi.

Senatning mas`ul qo`mitalari tomonidan mazkur murojaatlar atroflicha o`rganib chiqildi. O`rganish natijalari yuqorida ko`rsatilgan mahalliy Kengashlarning qarorlari haqiqatdan ham qonun talablariga zid ekanligini ko`rsatgan.

Xususan, Qarshi shahar, “Qarluqbog`ot” mahallasida yashovchchi fuqaro G.Xaydarova 2011 yilda uy-joyni xususiylashtirgan. Bu to`g`risida shahar hokimining qarori qabul qilingan. Biroq oradan 6 yil o`tib, 2017 yilda xalq deputatlari Qarshi shahar Kengashi shahar hokimining ushbu qarorini bekor qilgan. Vaholanki, amaldagi qonunchilik hujjatlariga muvofiq, xalq deputatlari mahalliy Kengashlari xususiylashtirish natijalarini qayta ko`rib chiqish hamda bekor qilish vakolatiga ega emas.

Mazkur holat atroflicha o`rganib chiqilganda xususiy mulkka doir barcha normalar va belgilangan tartib-taomillarga amal qilinmaganligi ma`lum bo`ldi. Oqibatda fuqaro yillar davomida sarson bo`lgan.

Xalq deputatlari G`uzor, Mirishkor, Qarshi tumanlari Kengashlarining fermer xo`jaligi bilan tuzilgan er ijarasi shartnomasini  bekor qilishga oid qarorlarida ham shu holat kuzatilgan. Mahalliy Kengashlarning fermer xo`jaliklari va tuman hokimligi o`rtasidagi shartnomaviy huquqiy munosabatlarga aralashish vakolati mavjud emas.

Bandixon tumanidagi “Bektepa” kichik sanoat zonasi hududida yo`l qurilishi masalasini ham qayd etish joiz. Tadbirkor tenderda g`olib bo`lgan, biroq u bilan shartnoma tuzilmasdan ob`ekt umuman boshqa tashkilotga berib yuborilgan. Xalq deputatlari Surxondaryo viloyati Kengashi esa o`z qarori bilan go`yoki hokimlikning ushbu xatti-harakatini qonunlashtirib bergan. Tabiiyki, bu tadbirkorning noroziligiga sabab bo`lmoqda.

Muhokamaga qo`yilgan mazkur mahalliy Kengashlarning qarorlari asosan 2020 yil va unga qadar qabul qilingan hujjatlardir.

Mazkur masala yuzasidan Oliy Majlis Senatining tegishli qarorlari qabul qilindi.