Kogon tumanidagi portlovchi moddalar ishlab chiqaruvchi sexda sodir bo‘lgan portlash 4 kishining o‘limiga sabab bo‘ldi. Voqea joyida hukumat komissiyasi ish boshladi.
Bugun, 6 dekabr kuni Buxoro viloyati Kogon tumanida joylashgan “Shahms LTD” MChJga qarashli portlovchi moddalar ishlab chiqarish sexida kuchli portlash yuz berdi. Favqulodda vaziyatlar vazirligining ma’lum qilishicha, hodisa soat 09:40 da “Mustaqillik” MFY hududida sodir bo‘lgan va oqibatda korxonada ishlayotgan 30 xodimdan 4 nafari halok bo‘lgan.
Mazkur korxona 2019 yildan buyon Markaziy Osiyo va O‘zbekiston tog‘-kon sanoati korxonalari uchun yangi konlarni o‘zlashtirishda qo‘llaniladigan portlovchi moddalarni ishlab chiqarib keladi.
Voqea joyiga zudlik bilan yetib kelgan Buxoro viloyati FVBNing 7 ta qutqaruv bo‘linmasi yong‘inni soat 10:27 da to‘liq o‘chirgan. Portlash natijasida yengil tan jarohati olgan 4 nafar xodim shifoxonaga etkazilgan. Ulardan ikkisiga ambulator yordam ko‘rsatilib, uyiga ruxsat berilgan.
Prezident Shavkat Mirziyoyev topshirig‘iga ko‘ra, hodisa bo‘yicha Sanoat xavfsizligi qo‘mitasi raisi Abduvaqqos Rafiqov boshchiligida hukumat komissiyasi tuzildi. Komissiya jabrlanganlarga yordam ko‘rsatish, portlash sabablarini o‘rganish, oqibatlarni bartaraf qilish va kelgusida bunday holatlarni oldini olish choralarini ishlab chiqish bilan shug‘ullanadi.
Hozirda hudud to‘liq nazoratga olingan va oqibatlarni bartaraf etish ishlari davom etmoqda.
