Prezident Shavkat Mirziyoev 15 mart kuni Qashqadaryo viloyatida hamda elektr energiyasi tarmog`ida amalga oshiriladigan investisiya loyihalari taqdimoti bilan tanishdi. Bu haqda Prezident Matbuot xizmati xabar berdi.
Qashqadaryo viloyatida hamma tarmoqlar bo`yicha salohiyat yuqori. Sanoat uchun zarur xomashyo resurslari, xizmat ko`rsatish uchun infratuzilma, qishloq xo`jaligi uchun er-suv va tajriba bor. Shulardan kelib chiqib, to`qimachilik, qurilish materiallari, kimyo va oziq-ovqat sanoati, turizm, uzumchilik, bog`dorchilik va chorvachilik asosiy “o`sish nuqtalari” sifatida belgilab olingan.
Joriy yil uchun umumiy qiymati 11 trillion 300 milliard so`m bo`lgan 1 ming 125 ta hududiy loyiha shakllantirilgan. Xususan, sanoat sohasida 296 ta, xizmat ko`rsatishda 449 ta, qishloq xo`jaligi tarmog`ida 380 ta korxona tashkil etilishi rejalashtirilgan. Bunda iqtisodiy samaradorlik va bandlikka alohida e`tibor qaratilgan. Bo`lg`usi korxonalarda yiliga 6 trillion so`mlikdan ziyod mahsulot ishlab chiqarish quvvati yaratiladi. Bu 131 million dollarlik import o`rnini bosish, 180 million dollarlik eksport qilish imkonini beradi. 19 mingdan ziyod kishi ish bilan ta`minlanadi.
Masalan, paxta-to`qimachilik klasterlari tomonidan 26 ta loyiha taklifi bildirilgan. Shundan 10 tasi tayyor mahsulot ishlab chiqarishga qaratilgan. Bularning natijasida paxta xomashyosini viloyatning o`zida qayta ishlash darajasiga sezilarli oshadi. Birgina shu tarmoqda 7 ming 600 dan ziyod ish o`rni tashkil etiladi.
Qashqadaryoda yiliga 106 ming tonna gipsokarton, 102 ming kvadrat metr kafel va boshqa qurilish materiallariga talab bor. Lekin, kerakli xomashyo bo`lishiga qaramay, viloyatda bu mahsulotlar umuman ishlab chiqarilmas edi. Shu bois bu sohada bir nechta loyiha rejalashtirilgan.
Misol uchun, Chiroqchi tumanida 210 milliard so`mlik loyiha evaziga gipsokarton, pardozbop toshlar, gazobeton, temir-beton konstruksiyalar ishlab chiqarish mo`ljallangan. Buning natijasida uy-joylar qurilishida 1 kvadrat metr tannarxini 25 foizgacha qisqartirish imkoniyati paydo bo`ladi.
Shuningdek, Chiroqchi tumanida kafel ishlab chiqarish, Shahrisabz shahrida granit va marmarni qayta ishlash bo`yicha loyihalar ham bor.
Qashqadaryoning tog`li tumanlari meva-sabzavot, uzum, kartoshka, kovrak kabi bozorbop mahsulotlar etishtirishga, dasht hududlar chorvachilikka ixtisoslashtirilgan. Jumladan, Nishon tumanida chorva kompleksi tashkil etib, sutni qayta ishlash bo`yicha 110 milliard so`mlik loyihaga kirishilgan. Bu majmuada 614 bosh naslli qoramol boqilib, yiliga 5 ming 760 tonna sut mahsulotlari tayyorlanadi. 230 nafar qishloq aholisi ishli bo`ladi.
Shahrisabz tumanining tog`oldi qishloqlarida kartoshka va sabzavotlar etishtirish loyihalari ham iqtisodiy, ham ijtimoiy jahatdan muhim. Buning uchun aholiga er ajratib berilib, mahsulotlar kooperasiya asosida sotib olinadi. Hisob-kitoblarga ko`ra, shu hududning o`zidan viloyatda kartoshkaga bo`lgan talabning 34 foizini ta`minlash mumkin. Bu ishlarga 6 ming 500 dan ziyod aholini jalb etib, ularga daromad manbai yaratish maqsad qilingan.
Davlatimiz rahbari loyihalarni bir-biriga yaqin, ixcham joylashtirib, kommunikasiya xarajatlarini kamaytirish, hududiy korxonalarni yirik sanoat tarmoqlari bilan bog`lash bo`yicha ko`rsatmalar berdi. Har bir loyiha zamirida aholini ish bilan ta`minlash masalasi yotgani uchun ularga mablag`larni tezroq ajratish zarurligini ta`kidladi.
Taqdimotda joriy yilda elektr energetikasi sohasida amalga oshiriladigan loyihalar ham ko`rib chiqildi.
Ma`lumki, aholi va iqtisodiyot tarmoqlarining elektr energiyasiga bo`lgan talabi yildan-yilga ortib bormoqda. Buni ta`minlash maqsadida eskirgan podstansiyalar va uzatish tarmoqlari bosqichma-bosqich yangilab kelinmoqda.
Xususan, bu yil magistral elektr tarmoqlari bo`yicha umumiy qiymati 140 million dollar bo`lgan 6 ta loyiha rejalashtirilgan. Ulardan biri 14 ta podstansiyani modernizasiya qilish loyihasidir. Buning samarasida Qoraqalpog`iston Respublikasi va viloyatlarda jami 1 ming 430 MVt qo`shimcha quvvat yaratiladi. Yana bir muhim jihati, ushbu podstansiyalardagi yillik elektr energiyasi isrofi 1,5 million dollarga, ta`mirlashga sarflanadigan xarajatlar qariyb 16 million dollarga kamayadi. Hisobga olish tizimidagi xatoliklar barham topadi.
Qolgan 5 ta loyiha yangi podstansiyalar va magistral elektr uzatish tarmoqlarini qurish hamda tiklashga qaratilgan.
Past kuchlanishli elektr tarmoqlarini modernizasiya qilish bo`yicha ham keng ko`lamli ishlar belgilangan. Xususan, 15 ming kilometr elektr uzatish tarmoqlarini, 4 mingta transformatorni yangilash choralari ko`rilgan. Bu ishlar natijasida yurtimizdagi 5 ming 377 ta mahallaning elektr ta`minoti yaxshilanadi.
Prezidentimiz bu loyihalarning iqtisodiy samardorligi va ijtimoiy ahamiyatini alohida ta`kidlab, ularni sifatli bajarish, elektr energiyasi ta`minoti barqarorligini oshirish bo`yicha topshiriqlar berdi.
21.10.2022, 13:45
Turkmanistonga rasmiy tashrif doirasida O`zbekiston Prezidenti Shavkat Mirziyoev ushbu mamlakat Parlamentining yuqori palatasi raisi Gurbanguli Berdimuhamedov bilan uchrashdi, deya xabar bermoqda Prexident matbuot xizmati. Davlatimiz rahbari...13.10.2022, 11:20
O`zbekiston Prezidenti Shavkat Mirziyoev Ostona shahrida bo`lib o`tayotgan Osiyoda hamkorlik va ishonch choralari bo`yicha kengash VI sammitida nutq so`zladi. O`zbekiston rahbari Afg`onistondagi vaziyatni hal etish va...29.08.2022, 11:46
Avval xabar qilganimizdek, Bugun Prezident Shavkat Mirziyoev Urganch shahrida buyuk sarkarda va davlat arbobi Jaloliddin Manguberdi haykalining tantanali ochilish marosimida ishtirok etish uchun Xorazm viloyatiga...17.08.2022, 16:42
Saudiya Arabistoni Podshohi Salmon bin Abdulaziz Ol Saudning taklifiga binoan ushbu mamlakatga borgan O`zbekiston Respublikasi Prezidenti Shavkat Mirziyoev tashrifni Madinai munavvara ziyoratidan boshladi. O`zbekiston rahbari Madina...