O`zbekiston Respublikasi Prezidentining tegishli qarori bilan Sog`liqni saqlash vaziri o`rinbosari vazifasida ishlab kelgan Shaxrux Sharaxmetov Monopoliyaga qarshi kurashish qo`mitasi raisi o`rinbosari etib tayinlandi. Bu haqda Sog`liqni saqlash vazirligi Jamoatchilik bilan aloqalar bo`limi xabar bermoqda.
Ma`lumot o`rnida:
Shaxrux Sharaxmetov 1977 yilda tug`ilgan. 1998 yilda Toshkent davlat iqtisodiyot universitetini, 1999 yilda esa Buyuk Britaniyaning Ekseter universitetini iqtisod, moliya va investisiyalar mutaxassisligi bo`yicha tamomlagan.
O`z faoliyatini Davlat mulki qo`mitasi huzuridagi Qimmatli qog`ozlar bozori faoliyatini muvofiqlashtirish va nazorat qilish markazi etakchi mutaxassisi vazifasidan boshlagan Sh.Sharaxmetov turli yillarda Iqtisodiyot vazirligi, Turizmni rivojlantirish davlat qo`mitasi va O`zbekiston Respublikasi Prezidenti Administrasiyasi kabi nufuzli tashkilotlarda mas`ul lavozimlarda mehnat qildi. Sh.Sharaxmetov Sog`liqni saqlash vaziri o`rinbosari etib tayinlanishidan avval Moliya vaziri o`rinbosari lavozimida faoliyat olib borgan.
Eslatib o`tamiz, Monopoliyaga qarshi kurashish qo`mitasining avvalgi raisi Sharipov Najmiddinxodja Toshkent viloyati hokimiga o`rinbosar bo`lgani haqida xabar bergan edik.
