Profilaktika inspektorlari elektr, issiqlik energiyasi, gazdan foydalanish qoidalarini buzish bilan bog`liq ma`muriy huquqbuzarliklar to`g`risidagi ishlarni ko`rib chiqish va jazo qo`llash vakolatiga ega bo`lishi mumkin. Bu "Mamuriy javobgarlik to`g`risida"gi kodeksga o`zgartirish va qo`shimchalar kiritish bo`yicha qonun loyihasida ko`zda tutilmoqda, deb yozadi Oliy Majlis quyi palatasining deputati Rasul Kusherbaev.
Ma`lumki, amalda bu turdagi qoidabuzarliklar bilan Majburiy ijro byurosi organlari shug`ullanib kelgan.
Deputatning ta`kidlashicha, Qonun loyihasini ko`rib chiqishda deputatlar ushbu vazifalarning profilaktika inspektorlariga o`tkazilishi ulardagi ish ko`lamining oshishi bilan birga korrupsion holatlar ko`payishiga ham sabab bo`lishidan xavotirda ekanliklarini bildirishgan.
" - Shaxsan men ham shunday fikrdaman: bu profilaktika inspektorlari o`rtasida o`z ishini vaqtida bajarishga ulgurmaslik va korrupsiya holatlari ortishiga olib kelishi mumkin. Kamiga inspektorlarning hammasi ham kommunal qoidalarni yaxshi biladigan energetiklar emas.
Loyiha hozircha birinchi o`qishda qabul qilindi", - deydi xalq vakili.
