Qarshi davlat universitetida buyuk bobokalonimiz Alisher Navoiy tavalludining 580 yilligi munosabati bilan o`quvchi-yoshlar o`rtasida o`tkazilgan "Yosh navoiyxon" tanlovida Qarshi tumanidagi 43-maktabning 7-sinf o`quvchisi Dilbar Ahmadova shoir qalamiga mansub 100 dan ortiq g`azalni yoddan ravon aytib berdi. Bu haqda Qashqadaryo viloyat xalq ta`limi boshqarmasi xabar berdi.
Tanlov shartlaridan biri ham shu - ishtirokchi Alisher Navoiyning kamida yuzta g`azalini yoddan bilishi va aytib bera olishi kerak edi.
13 yoshli qizning iqtidori hatto ko`plab adabiyotshunoslarning ham hayratiga sabab bo`ldi.
"Alisher Navoiy g`azallarini 3-sinfligimdan yodlay boshlaganman. Shu vaqtgacha 70 dan ortiq g`azal yodlagan edim. Tanlovda yuzta g`azal aytish kerakligi haqida eshitgach, shunga harakat qildim. Qisqa vaqt davomida Navoiy bobomizning yana o`ttizdan ortiq g`azallarini yod oldim",– deydi Dilbar.
Ayni paytda Dilbar yana 100 ta g`azalni yod olmoqda.
