Davlatimiz rahbari 2019 yili Samarqand viloyatiga tashrifi chog`ida Imom Buxoriy yodgorlik majmuasini kengaytirish zarurligini ta`kidlagan edi.
- Bu joy Imom Buxoriy bobomizning ilmiga, islom olamidagi maqomiga munosib bo`lishi kerak. Mamlakatimizda ziyorat turizmining asosi aslida shu er. Bu maskanga qancha ziyoratchilar kelsayam, qulay sharoit bo`lishi zarur, - degan edi Shavkat Mirziyoev o`shanda.
Shunga muvofiq, majmuaning yangi loyihasi ishlab chiqildi. Prezident huzurida bir necha bor taqdimot qilinib, takomillashtirildi. Jahon tajribasi ham o`rganildi.
2021 yil muborak Ramazon kunlarida ushbu ziyoratgohning qurilishi boshlandi. Shu munosabat bilan bu erda nuroniylar va ziyolilar bilan uchrashuv bo`ldi. Bu haqda Prezident Matbuot xizmati xabar bermoqda.
Shavkat Mirziyoev mo`min-musulmonlarni, butun xalqimizni muborak Ramazon oyi bilan muborakbod etgan.
– Ramazon oyi – ezgu niyatlar ijobat bo`ladigan muqaddas oy. Bu qurilishni shu oyda boshlayotganimiz ham xayrli, xosiyatli bo`ladi, qalbimizga taskin beradi. Bu sohada qilayotgan ishlarimizdan maqsad – islomga e`tiqodimizni, alloma bobolarimizga hurmatimizni ilm bilan bildirish. Ajdodlarimizga munosib bo`lish biz uchun juda katta burch, – dedi Shavkat Mirziyoev.
O`tgan yili pandemiya tufayli Ramazon oyida diniy amallarni uyda bajarishga to`g`ri kelgani yodga olindi. Bu yil esa masjidlarimiz ochiq, mo`min-musulmonlar karantin qoidalariga qat`iy amal qilib, ibodatlarini ado etmoqda. Keksalar, nogiron va yordamga muhtoj insonlar, kam ta`minlagan oilalarga beg`araz ko`mak ko`rsatilmoqda. Ayniqsa, butun dunyo og`ir inqirozni boshidan kechirayotgan hozirgi murakkab vaziyatda bu juda muhimligi ta`kidlandi.
– Muqaddas dinimiz bizni insonparvarlikni, tinchlik va osoyishtalikni qadrlab yashashga, mehr-oqibatli bo`lishga da`vat etadi. Mana shunday tushuncha va qarash bilan har bir oila va mahallada, butun jamiyatimizda tinchlik, do`stlik va hamjihatlikni mustahkamlashga erisha olamiz. Takror aytaman, tinchlik va sog`lik bo`lsa, qolgan hamma narsa bo`ladi, – dedi Shavkat Mirziyoev.
Ish o`rinlarini ko`paytirib, aholi farovonligini oshirish, turmush sharoitlarini yaxshilash chora-tadbirlari to`g`risida so`z yuritildi.
– To`rt yillik izlanish, yangilanish va sinovlardan o`tib, katta tajriba orttirdik. Xalqimizni hayotdan rozi qilishga qaratilgan ishlarimiz bundan keyin ham izchil davom ettiriladi. Ramazon oyining olijanob g`oyalari, muqaddas amallari ham ana shunday ezgu maqsadlarimizni ro`yobga chiqarishda mustahkam zamin bo`ladi, – dedi Prezident.
Qur`on oyatlaridan o`qilib, duo qilindi.
Davlatimiz rahbari majmuada amalga oshirilayotgan ishlarni ko`zdan kechirdi.
Bu erda katta masjid, to`rtta simmetrik minora, baland ayvonlar, yo`ldan kirib kelishda xiyobon bo`ladi. Ko`p sonli ziyoratchilarga zamonaviy qulayliklar yaratish uchun 7 ta mehmonxona, 3 ta avtotururgoh va avtobekat, supermarket, bozorcha barpo etiladi. Shuningdek, oshxonalar, hunarmandchilik buyumlari rastasi, hammom, tahoratxona, kushxona qurilishi belgilangan.
Ma`lumki, Prezident tashabbusi bilan 2019 yilda bu erda Imom Buxoriy xalqaro ilmiy-tadqiqot markazi hamda Hadis ilmi maktabi ham tashkil etilgan edi. Qurilajak yangi majmua ular bilan mutanosiblikda ulkan maskan hosil qiladi. Endi bu erda ziyoratchilar uchun hamma sharoitlar bo`ladi.
