Shavkat Mirziyoev Samarqand shahar chekkasida bunyod etilgan ko`p qavatli uylarni borib ko`rdi

Xabaringiz bor, ayni damda Prezident Shavkat Mirziyoev hududlardagi o`zgarishlar, aholi hayoti bilan yaqindan tanishish maqsadida Samarqand viloyati bo`lib turibdi. Davlat rahbari Samarqandga tashrifi davomida shahar chekkasidagi Qorasuv mavzesida qad rostlagan zamonaviy uy-joylarni ko`zdan kechirdi.

Prezident Shavkat Mirziyoev 2019 yilda viloyatga tashrifi chog`ida bu erdagi dastlabki uylarni ko`zdan kechirib, yangi loyihalar taqdimoti bilan tanishgan edi. O`tgan davrda bu loyihalar hayotga ko`chdi. “Agromir Buildings” mas`uliyati cheklangan jamiyati tomonidan mavzeda 16, 15, 14 va 12 qavatli jami 47 ta turar joy qurildi. Ularda 3 ming 588 ta xonadon bor.

Turar joylarning fasadi 3 qavatli qoplamadan iborat bo`lib, xonadonlar qishda issiq, yozda salqin bo`lishini ta`minlaydi. Binolarga videokuzatuv tizimi, yuqori texnologiyali yong`in xavfsizligi uskunalari o`rnatilgan. Har bir xonadon alohida isitish qozoni bilan jihozlangan. Uylar egalariga tayyor holda topshirilmoqda.

Umuman, Qorasuv mavzesida qurilgan ko`p qavatli uylar soni 116 taga etdi. Shuningdek, bu erda 1 ming 600 o`rinli maktab, 120 o`rinli bolalar bog`chasi, mahalla fuqarolar yig`ini binosi, savdo do`konlari, o`yin va sport maydonchalari barpo etilgan.

Joriy yilda yana 7 ta 16 qavatli, 2 ta 25 qavatli uylar qurilmoqda.

Davlatimiz rahbari uy-joylar va infratuzilma tarmoqlarining sifatiga alohida e`tibor qaratdi. Quruvchi tashkilotning sifat uchun mas`uliyati va javobgarligini yanada kuchaytiradigan mexanizm ishlab chiqish zarurligini ta`kidladi.

– Rivojlangan davlatlardagidek uylar qurishni o`zlashtirdik, endi xizmat ko`rsatishni ham shunga yarasha yaxshilash kerak, – dedi Shavkat Mirziyoev.

Chet el tajribasi asosida servis turlarini kengaytirish, ko`p qavatli uylarga xizmat ko`rsatuvchi korxona hamda yong`in xavfsizligini ta`minlash bo`yicha maxsus punkt tashkil etish yuzasidan tavsiyalar berildi.

 Shu erda Samarqand shahri Bosh rejasi va shahar hududini kengaytirish loyihalari taqdimoti o`tkazildi.