Rossiyaning «Nezavisimaya gazeta» nashrida xalqaro jurnalist Yuriy Sigovning «Toshkentning afg`on xaritasi» sarlavhali tahliliy maqolasi chop etildi, deb xabar bermoqda «Dunyo» AA.
Materialda O`zbekiston janubdagi qo`shnisining tinch hayotga erishishida etakchi rol o`ynash niyatida ekani alohida ta`kidlangan.
«Afg`oniston kun tartibidagi masalalar echimi nafaqat etakchi davlatlar, balki ushbu mamlakat bilan bevosita chegaradosh davlatlar, ayniqsa, O`zbekistonga ham bog`liq», - deb yozadi muallif.
Maqolada joriy yil yoz faslida Toshkentda «Markaziy va Janubiy Osiyo: mintaqaviy o`zaro bog`liqlik. Tahdidlar va imkoniyatlar» mavzusida yuqori darajadagi xalqaro konferensiya bo`lib o`tishi ta`kidlangan. «Afg`oniston butun mintaqa xavfsizligini ta`minlashda muhim ahamiyatga ega», - deb qayd etgan nashr.
«O`zbekiston Markaziy Osiyoning Afg`onistonda milliy manfaatlarini ilgari surish bo`yicha davlat darajasida strategiya qabul qilgan yagona respublikasidir»,- deb yozadi Yuriy Sigov.
