Shavkat Mirziyoev tibbiyot sohasidagi islohotlarning Sog`liqni saqlash vazirligi, uning viloyat, tuman va shahar quyi bug`inlari hamda mahalliy ijro idoralari tomonidan qay darajada amalga oshirilayotgani muhokamasiga bag`ishlangan videoselektor yig`ilishida bepul tibbiy xizmatlar paketini amaliyotga kiritish bo`yicha topshiriq berdi. Bu haqda “Darakchi” muxbiri xabar bermoqda.
Videoselektor yig`ilishida Prezident: «Bepul tibbiyot yo`q deyapti odamlar. Hammayoqda korrupsiya deyapti odamlar. Respublikadan mablag` ajratilyapti, lekin uning qadriga etib to`g`ri yo`naltirilmayapti», — deya ta`kidlagan.
Shu yil 1 iyuldan boshlab surunkali kasalliklarni birlamchi bo`g`inda davolash bo`yicha yangi tizim joriy etiladi.
Birinchi bosqichda Sirdaryo viloyatida oilaviy shifokor punkti va poliklinikalar orqali, erta o`limning asosiy sababi bo`lgan yurak va qon-tomir kasalliklarini davolash uchun aholi dori vositalari bilan bepul ta`minlanadi.
Davlat rahbari Sog`liqni saqlash vazirining birinchi o`rinbosari A.Inoyatovga bir oy muddatda birlamchi bo`g`inda davolash bepul tibbiy xizmatlar paketini amaliyotga kiritish topshirig`ini berdi.
